В словацькім парламенті бы могла выникнути ґрупа приятелів меншын

В народній раді Словацькой републікы бы могла выникнути ґрупа приятелів меншын. Рішыти бы мала леґіслатівны пропозіції, котры дотуляють ся меншыновых вопросів, і припомінковати їх. Інформовала о тім аґентура TASR.

Выникнутя ґрупы про меншыны хотять ініціовати незарадженый депутат парламенту Мірослав Коллар і бывшый уповномоченый влады Словацькой републікы про ромскы комуніты Абел Равас. Хотять досягнути высшу якость леґіслатівы, котра дотулять ся меншын на Словакії.

Хотять публічну і фахову діскусію

„Задачов ґрупы буде приготовльовати становиска і припомінкы ку парламентным пропозіціям, котры мають досяг на меншыны, і пак їх продіскутовати з тов ґрупов релевантных депутатів Народной рады Словацькой републікы,“ пояснив Коллар з тым, же публічна і фахова діскусія є потрібна.

В сучасности подля нього приготовлює ся леґіслатіва, котра дотулять ся меншын на „ad hoc базі“, хыбить продуманый і сістематічный приступ.

Равас додав, же ґрупа бы мала перед каждым засіданьом Народной рады припомінковати окремы пропозіції, котры дотуляють ся меншын. Наслідно бы ся мала стрічати з контактныма депутатами і діскутовати з нима о припомінках. Ку співпраці ся за словами бывшого уповномоченого позывать каждый депутат парламенту, котрый має інтерес рішыти меншыновы темы через ціле політічне спектрум.

Коллар, котрый є сам депутатом, вірить, же в парламенті ся найдуть депутаты, котры інтересують ся о меншыновы вопросы.

Меншыны в парламенті не мають представителів

Припоминаме, же по парламентных выборах, котры на Словакії проходили у 2020-ім році, першый раз в історії словацького парламенту не мають в нім меншыны своїх представителів в рамках даякого політічного субєкту.

Довгы рокы в парламенті здобывали мандаты мадярьскы політічны партії, по році 1998 то была зъєдинена Партія мадярьской коаліції (пізніше змінена на Партію мадярьской комуніты), од 2010-го року была в парламенті партія Most-Híd, котра ся профіловала як субєкт, котрый просаджує інтересы нелем Мадярів, але і далшых меншын, а має намагу будовати односины і межі майорітов а меншынами.

Равас быв членом партії Мost-Híd. Перед часом з партії одышов по тім, што мадярьскы партії на Словакії, включно Most-Híd, оголосили замір злучіти ся до єдного політічного субєкту, котрый бы мав шансу вернути до парламенту. Коллар ся до парламенту дістав як член партії Za ľudí, яку основав бывшый презідент Андрей Кіска. З партії і депутатьского клубу по незгодах одышов. Минулый вікенд став председом мімопарламентной партії Spolu.

Фотоґрафія: Dennis Jarvis / Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА