Першый раз святковав ся праздник Клокочівской Богородіці

Ґрекокатолицька церьков на Словакії в неділю 3-го октобра 2021-го року пережывала історічну дію. Першый раз святковав ся праздник з назвов Память чудотворной Клокочівской іконы Пресвятой Богородіці, Покровителькы Земпліна.

Як інформовав Пресовый центер Кошыцькой єпархії, в путницькім місці Кошыцькой єпархії в Клокочові з той нагоды проходив одпуст.

„Многы віруючі тым вєдно зо своїм єпархіалным єпіскопом владыком Кірілом Васильом пришли оддати честь копії Клокочівской іконі Пресвятой Богородіці, котра перед веце як 350-ма роками чудотворно слызыла,“ інформує центер.

Пришли і єпіскопи зо заграніча

Запрошіня архієпіскопа Кіріла Василя на тото торжество прияв владыка Філіп Кочіш, гайдудороґскый архієпіскоп і метрополіта зо сусіднього Мадярьска, крижевацькый єпарха владыка Мілан Стіпіч з Хорватії, як і емерітный кошыцькый єпарха владыка Мілан Хаутур. На архієрейскій літурґії, котрой головным служытельом быв ахієпіскоп Філіп Кочіш, проповідав крижевацькый єпарха Мілан Стіпіч.

На кінцю торжества архієпіскоп Кіріл Василь офіціално закінчів Юбілейный рік 350-ой річніці той дії, коли чудотворно слызыла Клокочівкса ікона Пресвятой Богородіці. Юбілейный рік быв одкрытый 4-го янара 2020-го року, но з причіны пандемії быв продовженый з єдного року на майже два.

Владыка Кіріл подяковав і свому попередникови, владыкови Міланови Хаутурови, котрый од 1997-го року ходив на того путницьке місце і обновив так почливость ку іконі в Клокочові. Наслідно ся в містній церькви, де є копія чудотворной іконы, помолили Молебен ку Іконі Пресвятой Богородіці в Клокочові.

Зорґанізовали наукову конференцію

Праздник опередила наукову конференція на тему Клокочівска Богородіця, Покровителька Земпліна, котра одбыла ся 1-го октобра в просторах Земпліньского музея в Михалівцях.

Орґанізовав єй музей у співпраці із Славістічным інштітутом Яна Станіслава Словацькой академії наук в Братіславі і Кошыцьков ґрекокатолицьков єпархійов. Підвечур участны конференції пішли до Клокочова на архієрейску літурґію. Літурґію з праздника Покровы Пресвятой Богородіці служыв кошыцькый єпарха архієпіскоп Кіріл Василь.

Слідуючій день продовжовала духовна приправа на недільный одпуст. Была заміряна на педаґоґічных і непедаґоґічных робітників, діти, школярів і штудентів церьковных школ і школьскых заряджінь, котрых зряджовательом є Кошыцька єпархія. Архієрейску літурґію в суботу одправляв емрітный кошыцькый єпарха владыка Мілан Хаутур.

Праздник Клокочівской Богородіці

Праздник Покровителькы Земпліна быв установленый Декретом Конґреґації про восточны церькви, котрый быв выданый у Ватікані 21-го децембра 2020-го року. Стало ся так на основі жадости метрополіты Пряшівской метрополії sui iuris архієпіскопа Йоана Бабяка і Рады єрархів, котру веде, при нагоді 350-ой річніці слызіня Клокочівской іконы.

Дектрет становив, же новый праздник ся буде каждый рік святковати першу неділю місяця октобер. В припаді, же на першу октоброву неділю прпиаде дата 1-го октобра, што є праздник Покровы Пресвятой Богородіці, Клокочівска ікона буде праздновати ся слідуючо неділя – другу в октобрі.

Клокочівску ікону Папа римскый Франціск 14-го септембра 2021-го року, по архієрейскій Літурґії св. Йоана Златоустого, котрой быв головным служытельом в Пряшові, торжественно коруновав.

Фото: Самуел Д. Бомбар

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА