Націоналным совітом Русинів буде рядити „волна перемін“

В неділю 8-го новембра 2026-го року в Сербії членове народностных меншын могли голосовати у выборах, котрыма собі на далшы чотыри рокы выберали своїх представителів в націоналных совітах.

Русины так само голосовали і выберали собі склад Націоналного совіту Русинів, котрый має 19 членів. 9-го новембра вечур были Републіковов выборчов комісійов публікованы резултаты, котры іщі все не были потверджены як фіналны.

Мож конштатовати, же Націоналный совіт Русинів чекають зміны, і мандатів хоплять ся новы люди.

Лем 4 кандідачны спискы

Голосовати в тогорічных выборах до Націоналного совіту Русинів мож было на 187 місцях.

Русины в Сербії мали записаных 6 951 людей, котры мали право у выборах до націоналного совіту голосовати. Голосовало 2 924 особ, што представлює участь на уровни 42 процент. Є то менше як в попередніх выборах, коли голосовати пришло 50 процент людей.

Але нелем в тім мають тогорічны выборы низшы чісла. Тот рік были приголошены чотыри кандідачны спискы. Із того лем три здобыли мандаты. Перед 4-ма роками кандідовало пять списків, причім втогды собі мандаты розділило вшыткых пять.

Найвеце мандатів На волні перемін

Подля резултатів, котры были публікованы Републіковов выборчов комісійов, выборы выграв кандідачный список під чіслом 3 із назвов На волні перемін (оріґ. На габи переменкох), котрый здобыв нецілых 65 процент голосів. Нова ініціатіва, котра выникла під впливом цілодержавных політічных змін в Сербії, бы подля тых резултатів мала мати 13 із 19 мандатів.

То значіть, же „волна перемін“ буде мати абсолутну векшыну в Націоналнім совіті Русинів, і на схвальованя своїх пропозіцій не мусить глядати ани партнера із іншых кандідачных списків.

Кандідачный список під чіслом 1 Русины довєдна (оріґ. Руснаци вєдно), котрый выграв два попередні выборы, і перед 4-ма роками мав понад 23 процент і 10 мандатів, в новім складі совіту буде мати скромнішу репрезентацію. Русины довєдна здобыли лем 16,97 процента, што бы їм мало забезпечіти лем три мандаты.

Під чіслом 2 быв кандідачный список Щіро за Русинкы і Русинів – проф. Др. Михайло Фейса (оріґ. Щиро за Рускинї и Руснацох – проф. др Михайло Фейса). Тот здобыв 14,81 процента голосів, і в новім складі совіту бы мав мати так само 3 мандаты.

Фейса быв у пепередніх выборах чотыри рокы тому лідером кандідачного списку Руська матка за Русинів (оріґ. Руска матка за Руснацох). Здобыв втогды 3 мандаты як і теперь, лемже в попердніх выборах мав Фейса другу найвекшу кількость голосів по Русины довєдна, теперь скінчів аж на третім місці.

Без мандату зістав кандідачный список чісло 4 Музика Русины Славко Роман Рондо (оріґ. Музика Руснаци Славко Роман Рондо), котрый здобыв лем 3,18 процента голосів.

Фото: Мірон Джуджар/Рутенпрес.