Уж і інформачны значкы на драгах можуть быти в языках меншын

Інформачны дорожны значкы в селах і містах будуть годны быти окрім словацького языка написаны і в языках народностных меншын.

Таку новелу закона о хоснованю языків народностных меншын в середу 20-го октобра 2020-го року схвалили депутаты Народной рады Словацькой републікы. До закона ся запроваджать можливость хосновати в селах і містах інформачны дорожны значкы з назвов вызначеных цілів в державнім языку, і в языку народностной меншыны.

Уповномоченый є спокійный

„Вчера парламент схвалив новелу языкового меншынового закона, в котрій уточнив і посилнив існуючі языковы права меншын при дорожнім значіню і транспортных заряджінях. Я радый, же публічна і фахова діскусія за остатні тыждні, і наперек тому, же ся до діскусії принесли і особны інвектівы, помогла одстранити хыбы первістной пропозіції новелы,“ написав днесь на своїм офіціалнім профілі на сіті Facebook Ласло Буковскый, уповномоченый влады Словацькой републікы про народностны меншыны і етнічны ґрупы.

Буковскый тым непрямо вказав на пропозіцію новелы од депутата Дьордя Дімешія, котра была крітікована нелем уповномоченым, але неґатівне становиско ку тому прияв і Выбор про народностны меншыны і етнічны ґрупы. Пропозіція Дімешія мала хыбы, котры бы, наопак, меншыновы языковы права могли ослабити.

„Тішыть ня, же наконець в тій справі брало ся до відома узнесіня Выбору про народностны меншыны і етнічны ґрупы а моє становиско, котре єм на основы вызвы председы Народной рады Словацькой републікы передложыв ґесторови закона,“ продовжовав Буковскый з тым, же вірить, же при аплікації закона будуть односны орґаны потрібным способом рефлектовати зміну закона.

Зміна од нового року

Дотеперь в языку народностной меншыны писала ся назва села або міста на значках, котры означовали їх зачаток або конець, на будовах орґанів верейной справы, на публічных будовах, желізнічных станіцях і заставках як і на далшых выбраных місцях.

Новела розшырить двоязычность на Словакії о далшы значкы. Нова леґіслатіва має быти платна од 1-го януара 2022-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА