Сумар дня на 26. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 26. жолтня/октобра 2021 р.

Наступный одтинок дорогы С3 од пятниці буде одкрытый

В пятницю, 29. жолтня/октобра, до руху одданый буде одтинок новопобудуваной дорогы С3 [S3] Польковиці – Любін Пілніч. Інформацию передал выконавця інвестициі. Од пятниці мож буде іздити одтинком дорогы од транспортовой розвязкы Любін Захід до Польковиці Полудне та розвязкы Любін Пілніч разом з локальном дорогом Любін – Овчары- Бєджыхова. На остатній одтинок дорогы, з Польковиц до Казьмєжова, треба буде іщы хвилю пождати, але як поінформувал выконавця інвестициі – працы закінчены будут в половині листопада/новембра.

Што буде ся діяло в тым тыжни в Музею Русиньской Культуры в Пряшові?

Од 27. жолтня/октобра в Музею Русиньской Культуры в Пряшові мож буде обзерати выставу пн. «На кінци рана» Любослава Крайняка – молодого маларя русиньского походжыня. Єст то перша професийональна выстава того артисты. Находячы ся в збірці творы вказуют нестабільніст і деформацию людскых постав, як і іх ідентичніст. Не єст то конец акций зрыхтуваных музейом на тот тыжден. 28. жолтня/октобра о год. 16.00 в музею пройде стріча з Васильом Ябуром – єдным з кодифікаторів русиньского літературного языка і єдным з найвызначнійшых Русинів на Словациі. Подія орґанізувана єст з нагоды 85. річниці народин Василя Ябуры.

«Промысел і народне ремесло на обшыри Погіря і Лемковины»

Припоминаме, же іщы лем до 1. листопада/новембра в Музею Дворы Карвациянів і Ґладышів – одділіня Скансен Погіряньского Села в Шымбарку мож обзерати выставу пн. «Промысел і народне ремесло на обшыри Погіря і Лемковины». Выстава проходит в рамках проєкту пн. «Skansenova – системова опіка над спадковином в малопольскых музеях під одкрытым небом». Експозиция презентує так сучасны, як і архівальны фотоґрафіі, што представляют ремісників, але тіж обєкты репрезентуючы сельскій промысел обшыри Погіря і Лемковины. Знимкы походят зо збіркы Музею Дворы Карвациянів і Ґладышів і з Реґіонального Музею в Яслі.

В Реґєтові прошол єдиный в цілій Малопольщы редик кони

23. жолтня/октобра в Ден Конярів близко 100 кобыл і гачат вернуло з літніх паствиск Выжнього Реґєтова до Стаднины Гуцульскых Кони в Реґєтові. Каждого рока подія притігят вельох туристів, котры або обзерают цілу акцию з брычкы, або уставляют ся вздолж 8-кілометровой трасы. Подібні было і того рока, мимо пандеміі в Низкій Бескід приіхало вельох заінтересуваных. В полудне проходили бігы св. Губерта – «іманя лишкы». На конец одбыл ся традицийный Баль Коняря в Корчмі Гуцулянка.

«Слідами втраченой карпатской архітектуры» – стріча зo Станіславом Криціньскым 

На конец запрошыня для вшыткых любителів вандрівок карпатскыма путями. Выдавництво Лібра та Книгарня Бонобо просят на стрічу «Слідами втраченой карпатской архітектуры» зо Станіславом Криціньскым – пасийонатом істориі і краєвидів, автором многых туристичных, історичных і краєвидовых публикаций, в тым книжок о Бєщадах, Лемковині і Перемышльскым Погірю. В часі стрічы оповіст він о вандрівках неістнуючыма уж стежками та о діянях для документациі і захованя культуровой, материяльной спадковыны жытелів обшыри од Перемышльского Погіря через Бєщады аж по Низкій Бескід. Буде тіж нагода купити книжкы авторства Станіслава Криціньского. Стріча, котра єст уж остатньом з циклю «Штырі подорожы малы і великы – зрівноважена туристика в часах пандеміі», пройде 9. листопада/новембра в Книгарни Бонобо в Кракові.

фот. Gazeta Krakowska