«Слово» – 20-та неділя по Сошествії Святого Духа – неділя, 9.00 год.

Днешнє слово говорить нам о двох процесіях. О процесії жывота і процесії смерти. В єдній іде Ісус з учениками і множеством народа. Ісус учіть по дорозі. Люде його слухають.

Так приходять ку місту Наім. Там якраз выношають в процесії мертвого сына матери – вдовіці. Кедь ся тоты дві процесії зышли, Ісус говорить жені, матери, не плач. І дотулив ся мар. Тоты, што їх несли, заставили ся. Ісус говорить хлопцьови – встань. Мертвый собі сів і зачав говорити.

Ісус приходить ку процесії смерти і минить єй на процесію надії і жывота. Говорить жені – не плач. Не говорить так, як мы маме звычай дакого потішати у великій біді. Але як тот, котрый може тото змінити. Його слово мать силу, мать міць. Бо він владыка неба і землі, жывота і смерти. Він выповів слова мертвому а він, якбы спав такой собі сів і говорив. Указує так на своє божество.

Але тов подійов і нам указує приклад. Приклад, же можеме перейти із той процесії смерти до процесії жывота. Він тото може зробити, може воскресити нашу душу, так як наімского хлопця. Робить то в тайні покаяня, де на нас чекать, же принесеме нашу мертву душу гріхами, роскошами, страстями. Же прийдеме і выповіме вшытко, што в нас є, і втогды Ісус через одпущіня гріхів ожывлять нашу безсмертну душу, наповнять єй радостьов, покойом.

Но не зробить тото насилу. Чекать на нас, же мы самы прийдеме. Давать нам можность перейти із той процесії смерти, безнадії і болести, вытыканя совісти до процесії радости, покоя, спасіня.

Він приходить першый, од нас хоче выйти оперед нього, подобно наімскій вдовіці. Жебы і нашій душі міг повісти тоты радостны слова: Встань ку новому жывоту. Жывоту зо мнов в радости, в покою совісти. Жывоту подля мойого слова, моїх заповідей. Жывоту, котрый веде ку славному воскресіню і вічній блажености. Слава Ісусу Хрісту!

В неділю, 7. новембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. новембра о 12.00 год. і 8. новмембра о 2.00 год. за русиньскым часом.