Сумар дня на 10. листопада/новембра 2021 р.
Приносиме вам сумар медияльной ґрупы ЛЕМ.фм+ на ден 10. листопада/новембра 2021 р.
Костельникова Осін в Сербіі
Минулый вікенд проходил серед Русинів Сербіі під знаком культурного фестівалю Костельникова Осін. Чергова едиция обнимала подіі з обшыри літературы, фільму, стріч з творцями. В єден з фестівальовых вечерів реализуваный был в Рускым Керестурі проґрам для молодых. Было одкрытя выставы фотоґрафій, яка была завершыньом фотоконкурсу «Без цензуры», был тіж показ фільму пн. «Фільм о Дньовці» і стріча з фільмовцями. Присутны могли выслухати і радийорепортаж «Протесный хор» Александры Бучко, котрый на тогорічным фестівали Інтерфер в Бельграді здобыл 2 місце. В рамках фестівалю Костельникова Осін прошла тіж в Рускым Керестурі стріча з творцями получена з презентацийом публикаций Новинарско-выдавничой Установы «Рускє Слово». Присутны были авторы: Михал Рамач, Янко Сабадош, Мирон Жырош, Ясміна Дюранін. І в дальшым русиньскым селі в Дюрдьові проходила фестівальова промоция книжок і бесіда про літературу.
В Любіні найліпше. Ранкінґ для ППА
Місто Любін, в якым прожыват великє чысло представників лемківской спільноты, нашло ся на першым місци в ранкінґу Самоурядового Сервісу Польской Пресовой Аґенциі. В зоставліню находит ся 2477 ґмін Польщы. Авторы ранкінґу анализували 48 факторів, беручы до увагы м.ін. доступ до здравотной опікы, рекреациі ци зеленых обшыри, якіст освіты, інвестицийніст ґмін ци міґрацийно-осадничу атракцийніст. Ґміны поділено на пят катеґорий. Любін занял перше місце в своій катеґориі – ґмін з сідибом повіту. В загальнопольскым ранкінґу Любін занял 59 місце. Сусідня Ліґниця серед ґмін нашла ся на 240 місци, a місто Ґорлиці в своій катеґориі заняло 184 місце.
Новы інвестициі в Польковицях
Роверовый шляк получыт ґміны Польковиці і Ґрембоціце. Буде то в рамках дороговой інвестициі польковицкого повіту, якій здобыл на тоту задачу близко 14,2 млн зл. Повіт здобыл середкы з Урядового Фундушу Польскій Порядок, з Проґраму Стратеґічных Інвестиций на модернізацию повітовых доріг в обшыри будовы роверовых стежок, што звязане є з концепцийом Мідьовой Роверовой Пути. Реализация інвестициі заплянувана є на рокы 2022-2023. Перше зроблят стежкы в ґміні Польковиці. Польковицкій повіт зложыл так само внесок на перебудову повітовых доріг в Пшемкові.
Етноґрафічна выстава в сандецкым скансені
Выстава пн. «Промысел і народне ремесло на обшыри Погіря і Лемковины» зреализувана Музейом Дворы Карвациянів і Ґладышів – одділіня Скансен Погіряньского Села в Шымбарку перенесла ся з Шымбарку до Округового Музею в Новым Санчы до Етноґрафічного Парку. Выстава презентує так сучасны, як і архівальны фотоґрафіі, што представляют ремісників, але тіж обєкты репрезентуючы сельскій промысел обшыри Погіря і Лемковины. Вказаны сут такы професиі як ковальство, боднарство, теселька, гончарство ци столярка, але тіж тоты, котры барже асоциюют ся з жіночыма занятями: з шытьом, вышываньом ци вырабляньом коронок.
Рушыла будова інгаляториі в Ґорлицях
В ґорлицкым Містным Парку рушыла будова солянковой інгаляториі. Возношена єст на місци парковой кавярні, до недавна культового пункту на мапі Ґорлиц. Інгалятория запроєктувана є на пляні колеса, єй центральный пункт становила буде конструкция выполнена терньовыма голузками, докола котрой найде ся задашеный пляц. Голузкы тернины будут уложены під одповіднім кутом, так жебы сплываюча солянка розбивала ся в солянкову гмлу, котром буде мож дыхати. Нова атракция буде готова до кінця того рока.
Повязаны дописы
Ґорлиці 106,6 MHz
