В Белеграді одсвятковали Меджінародный день людьскых прав з меншынами

В Палаці Сербії в Белеграді 10-го децембра 2021-го року одбыв ся Форум людьскых прав – Сербія 2021. Форумом святковав ся Меджінародный день людьскых прав, котрый припав на тоту дату. Інформовала о тім аґентура Рутенпрес.

Святочну і робочу подію одкрыла міністерка про людьскы права, права меншын і соціалный діалоґ Ґордана Чоміч. Шефка людьскоправного і меншыного резорту припомянула, же єдным із першых засідань новоформованого міністерства было засіданя з представителями націоналных совітів, орґанів меншыновых самосправ.

Тоты одбыли ся кінцьом новембра минувшого року, і мали за ціль пояснити проблемы у вырішованю меншыновых прав. Одвтогды аж дотеперь зреалізовало ся много засідань, стріч, діалоґів і форумів, жебы ся зліпшыло поставліня меншын, жебы ся рішыли актуалны проблемы, з котрыма етнічны ґрупы і народностны меншыны стрічають ся.

На події были і три панеловы діскусії присвячены темам людьскых і меншыновых прав. В діскусіях брала участь і Олена Папуґа, котра є державным секретарьом Міністерства про людьскы права, права меншын і соціалный діалоґ. Участный на форумі быв і председа Націоналного совіту Русинів Борислав Сакач.

На засіданю были участны чісленны представителі світовых і европскых інштітуцій, Орґанізації Соєдиненых народів, Орґанізації про безпечность і співпрацу в Европі, Рады Европы, представителі сербскых властей, як і представителі націоналных совітів меншын у Сербії.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА