Презідентка: Резултаты списованя бы ся мали інтерпретовати прязно в одношіню ку меншынам

Резултаты Списованя жытелів, домів і квартелів 2021 бы ся мали інтерпретовати в одношіню ку народностным меншынам прязно. Презідентка Словацькой републікы Зузана Чапутова то написала у віторок 26-го януара 2022-го року на соціалній сіті Facebook.

Представителі меншын суть подля презіденткы в неістоті, бо державны орґаны дотеперь не высловили ся, якым способом будуть даны, котры дотуляють ся народностей, інтерпретованы.

„При вопросах меншыновых прав бы ся мало выходити зо зрахованя обидвох народностных катеґорій (обидвох вопросів, позн. ред.), котры были в методіці Штатістічного уряду браны за рівноціны. Про розрішіня страхів думам, же є потрібне в комунікації з представителями народностных меншын в штонайкоротшім часі доїднати і єднотну інтерпретацію односных правных норм,“ выголосила презідентка.

Списованя подля головы державы потвердило, же Словакія є країнов з вызначным чіслом народностных меншын. Вказала на то, же аж 300 000 обывателів схосновало можность приголосити ся ку двом народностям.

„І тоты дата суть жрідлом ліпшого познаня сполочности, котру твориме,“ підкреслила презідентка. Даны о народности має голова державы за основу про реалізацію меншыновых прав уможнюючіх розвивати свою културу, освіту ці материньскый язык.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА