Сумар дня на 3. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2022 р.

«Матір Божа» – книжочка по лемківскы

Як інформує Єпархіяльный Осередок Православной Культуры ЕЛПІС в Ґорлицях, в останіх днях по чысленных перипетиях вказала ся друком по лемківскы книжочка для діти (і не лем), якы хотят ближе познати жывот Пресвятой Богородиці. Выданя є під наголовком «Матір Божа». Публикация прикрашена є кольоровыма ілюстрациями. Є то продолжыня книжочкы, яка вказала ся пару років тому, під назвом «Жытя Христа». Ціна єдного примірника то 25 зл. Книжочку мож одобрати в Ґорлицях по скоршым контакті з выдавцьом. «Матір Божа» може служыти як поміч для лемківскых діти, якы вчат ся Закону Божого.

Вмер Олег Смолей

2. лютого/фебруара вмер Олег Смолей, здібный музикант, якій знаный был м.ін. з участи в ансамблю Лемко Тавер і Лемко Тавер Юньор. Был першым опікуном той ґрупы. Покійный присутный был на вельох лемківскых подіях, брал участ в ріжных музичных проєктах. Вюл тіж діяльніст як дириґент церковных хорів на лемківскых парохіях во вроцлавско-щеціньскій єпархіі ПАПЦ, был і церковным дяком. Робил в Осередку Культуры в Стшельцях Краєньскых. Был тіж членом парох польскых ансамблів. Заран о 18.00 год. буде в православній церкви св. Михала в Березі правленый парастас, а в суботу о 11.00 год. зачне ся літургія і пак похорон на цмонтери в Стшельцях Краєньскых.

Премія Дельвиґа за працу о Павловичу

Доцент Факультету Журналистикы Білоруского Державного Університету Сергій Зеленко был удостоєный Медженародном Літературном Премійом імени Антона Дельвиґа «За вірніст Слову і Отчызні». Высокє оцініня было му признане за науково-дослідничу роботу з назвом «Образ Отчызны-Матери в громадяньскій ліриці Александра Павловича». Робота была оцінена в катеґориі Наука і освіта. Білорускій вченый Сергій Зеленко студиювал творы єдного з найвекшых русиньскых будителів і выбрал в них три художны образы вітчызны. В конкурсі в тым році брало участ 52 авторів з Росиі, Білоруси і Чорногоры.Тексты оціненых авторів-лавреатів будут опубликуваны в збірниках «Настоящее прошлое – художественное слово и публицистика» і «Настоящее прошлое – наука и просвещение». Оцінены авторы были торжественно нагороджены 29. січня/януара того рока. Медженародна літературна премія імени Антона Дельвиґа была основана в 2012 р.

Выстава творчости Мирослава Трохановского. Споможме творцю

Припоминаме, што того рока має быти зорґанізувана в ґорлицкій Ґалериі Двір Карвациянів выстава творчости Мирослава Трохановского. Має она мати наголовок «Місто нескінчене». На жаль, Ґалерия не єст в силі найти фінансів на выданя каталоґу, котрый мал бы промувати выставу. З той причыны на сайті www.zrzutka.pl Мирослав Трохановскій зорґанізувал тырваючу іщы 10 дни колекту на тоту ціль. Заохочаме спомочы творцю. Як пише Трохановскій, каждому, хто не зможе прити на выставу, постарат ся він переслати каталоґ. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит і карпатскы краєвиды і лемківскы церкви. На сайті www.lem.fm найдете статю сперед парох дни, де одсыламе до збіркы.