Сумар дня на 4. марця 2022 р.

Приносиме вам сумар медияльной ґрупы ЛЕМ.фм+ на ден 4. марця 2022 р.

Внесок омбусдмана одкликати розпоряджыня МЕіН дискримінуючы німецку меншыну

Польскій омбудсман Марцін Вьонцек зложыл внесок до премєра Матеуша Моравєцкого, жебы выступил до Рады Міністрів цілю одкликати розпоряджыня Міністра Едукациі і Наукы, якы ограничают вчыня німецкого языка як меншынового. Припомнийме, же згідно з розпоряджынями од 1. вересня/септембра тр. тыжньове чысло годин вчыня німецкого як меншынового языка має быти зменшене з трьох до єдной годины. Зміна не тыкат інчых меншын. За омбудсманом, має то дискримінуючый характер і єст незгідне з конституцийом та медженародныма законами. Інчым розпоряджыньом некорыстно змінено правила нарахуваня субвенциі для учеників німецкой меншыны, для котрых вчыня языка меншыны єст реализувана в додатковій формі вчыня того языка. Розпоряджыня сут консеквенцийом буджетового закону на текучый рік, якій зменшат част освітовой субвенциі на вчыня языків нацийональных і етнічных меншын о близко 40 млн злотых. За словами омбудсмана, в актуальных обставинах, без заанґажуваня державы і єй інституций, захованя і розвиток культуровой достоменности меншын не буде можливе.

Православный Осередок Милосердя ЕЛЕОС Перемышльско-Ґорлицкой Єпархіі помагат Украіні

Православный Осередок Милосердя ЕЛЕОС Перемышльско-Ґорлицкой Єпархіі фурт веде збірку дарів для біженців з Украіны. Листа потрібных річы єст опубликувана на фейсбуковым сайті осередка і єст актуализувана в залежности од потреб. Вшыткы річы мож приносити до сідибы Осередка в Ґладышові, як і до храмів перемышльско-ґорлицкой єпархіі. Осередок помагат біженцям на місци, як і посылат дары для потрібуючых в дальшу дорогу. Транспорты з зобраныма річами іхают і безпосередньо до Східниці на Украіні. Східниця находит ся в львівскій области Украіны і єст партнерскым містом Санковой. Актуально находит ся там великє чысло біженців зо східньой части Украіны. Окрем збіркы, осередок веде тіж банкове конто, на якє мож вплачати офіру на поміч потерпілым од войны на Украіні.

Русиньскы выдавництва на Медженародным торгу книжок

В днях 3.-13. марця тр. в Новым Саді проходит Медженародный торг книжок. Подія є тот рік повязана з подіями, якы проходят в році, коли Новый Сад має званя Европейского Головного Міста Культуры. І тот рік на торгах будут представлены новы публикациі выдавництв, котры печатают книжкы по русиньскы. Днес новы публикациі презентує Дружство про русиньскій язык, літературу і культуру. Зато 10. марця своі публикациі будут презентувати выдавництцо Рускє Слово вєдно з Заводом про культуру войводиньскых Русинів. В тот сам ден Михайло Фейса з Одділіня русиністикы Університету в Новым Саді представит і выданя правопису з правописным словником, а Міряна Дєкіч запрезентує моноґрафію о нашым найвекшым селі в Войводині – Рускым Керестурі.

Выстава фотоґрафій Петра Басалыґы в Жеґєстові

Публична бібліотека міста і курортной ґміны Мушына філия в Жеґєстові просит не выставу лемківского фотоґрафа Петра Басалыґы, якій од вельох років документує на своіх фотоґрафіях важны подіі, краєвиды ци архітектуру Лемковины. Выставу пн. «Жеґєстів, краса тишыном вколысана» мож обзерати до кінця того місяця в будинку Філиі Публичной Бібліотекы в Жеґєстові.