Як што рока, 5. марця 2022 рока в Ґорлицях одбыло ся загальне зобраня членів Стоваришыня Руска Бурса, котре за ціль має підсумувати діяльніст общества за влонишній рік, накрислити текучы і будучы проблемы та выбрати новы власти орґанізациі.
Бурсяну стрічу зачала дотеперішня ведуча РБ Наталия Малецка-Новак, яка звернула ся до присутных з просьбом станути і оддати чест вшыткым невинным жертвам росийской інвазиі на Украіну. Як підкрислила ведуча зачынаючы свою промову, два послідні зобраня были одкрываны в обставинах ріжных бід, а тепер пришла дальша – война. Дост уж тых бід, дост!
Шторічны формальности
Каждый рік, жебы стоваришыня могло діяти, смотрячы од правно-формальной стороны, треба выполнити поєдны пункты. Так і бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови.
По тым выбраный был заряд на наступну каденцию, на котрого челі рішыньом присутных зас станула Наталия Малецка-Новак. В ведіню Стоваришыня Руска Бурса до наступного загального зобраня будут ій помагати нововыбраны дальшы члены заряду: Олена Дуць, Павел Малецкій, Адам Шевчык, Андрий Трохановскій і Даміян Трохановскій.
Шторічны проблемы то тепер… проблемиска
Бурсакы дискутували о текучых справах. Найголовнійшым проблемом на днес сут збільшаючы ся фурт ціны енерґіі. Для Руской Бурсы, котра не єст фікцийном орґанізацийом (якых маме вельо), лем діючом 24/7 інституцийом культуры, а єй просторы одкрыты сут такой штоден од понеділька до суботы, то великє вызваня. Трикрат більшы фактуры за світло і ґаз онедолга примусят нас до радикальных кроків в нашій штоденній діяльности.
На жаль, вшыткы актуальны і послідні біды – пандемія Covid–19, шаліюча інфляция, а тепер война на Украіні – не сут прихыльны жадній орґанізациі.
Надійме ся, же о рік стрітиме ся в ліпшых обставинах…
Повязаны дописы
Ґорлиці 106,6 MHz
