Сумар дня на 28. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2022 р.

Днес 75. річниця початку Акциі «Вісла»

Днес выходит рівно 75. років од початку Акциі «Вісла», в рамках якой польскы власти зачали насильну депортацию Русинів з Лемковины на західні і пілнічны землі повоєнной Польщы. Акция «Вісла» зачала ся вчасным ранком 28. квітня/апріля 1947 р. Рахує ся, же выселеных в часі акциі «Вісла» было близко 150 тис. люди, в тым чыслі праві 35 тис. Русинів з Лемковины. Выселіня проходило постепенно, аж до липця/юлия 1947 р. Етнічні чыстили село по селі, іх жытелів під ґвером, примусово выганяли. Лемківскы родины мали мало часу, жебы забрати свій маєток. Вельох Лемків было поневоленых в лаґрі в Явожні. Дослідникы – історикы не сут согласны в оціні, ци рішыня про выселіня Русинів і Украінців было придумане в Варшаві ци в Совітскым Союзі.

Спільнотовы упамятніня

Припоминаме, што в суботу, 30. квітня/апріля, одбудут ся споминовы подіі в 75. річницю Акциі «Вісла». Хотячы упамятнити тоты подіі, зыйдеме ся в місцях, якы не лем символично – але і фактично – засвідчуют про траґедию нашых дідів, родичів і дальшых поколінь Лемків. Першым пунктом в проґрамі буде одданя чести жертвам лаґру працы в Явожні при лемківскым місци памяти. Подіі в Явожні заплянувано на 11.00 год. Великодня молитва за вшыткы жертвы выгнаня вызвучыт в церкви св. Михала в неістнуючым по выселінях селі Білична о 14.00 год. Пак зобраны переіхают до Устя Руского, де о 15.00 год. під памятником в центрі села зложене буде квітя. Посліднім пунктом буде стріча, яка зачне ся о 17.00 год. в просторах ґорлицкой Руской Бурсы. До спільнотовых упамятнінь кличут вєдно Стоваришыня Лемків і Стоваришыня «Руска Бурса» в Ґорлицях.

Санкова хоче будувати басен

Ґміна Санкова оголосила оферту на будову крытого басену. Конкурс оферт має быти закінченый в половині мая. Кєд вшытко буде згідно з пляном, меньше-більше о два рокы буде мож хоснувати новый басен в реґіоні. Будинок обєкту має мати близко тисяч квадратных метрів. Має быти єден внутрішній басен і два зовнішні. Доступны будут такы атракциі як масажы, але тіж руры до зъіздів до воды, зона SPA ци сауны. Власти ґміны ждут тепер на оферты выконавців, пак будут мочы підняти дальшы рішыня.

Підпора бізнесу і туристикы ПСК

Підпора бізнeсовой сферы, спілпраца з заграницьом і розвиток словацкого експорту. То головный мотив подіі «З реґіонів до світа», з котром Міністерство Заграничных Діл і Европейскых Справ Словацкой Республикы пришло на два дни до Пряшівского Самосправного Краю. Представникы державных ресортів, самоурядів і публичного сектора в звязку з тым дискутували в понедільок, 25. квітня/апріля, в Пряшові в рамках округлого стола з малыма і середніма підприємцями, але і представниками академіцкой соспільности і безпрофітового сектора. Пряшівскій Край є єдным з тых, котры мают найвеце одвиджаючых, зато плянує творити робочы місця, жебы пропаґувати серед туристів красу ПСК.