Уліця Александра Духновіча в Мукачові зістане

Як сьме інформовали у віторок 3-го мая 2022-го року, в Мукачові на засіданю Комісії з вопросів сохраніня історічной дідовизны, названя і переменованя уліць а встановліня памятных знаків, мала рішыти ся і пропозіція переменованя Уліці Александра Духновіча.

Уліцю, котра є прямо в історічнім центрі міста, пропоновав депутат Мукачівской містьской рады за Всеукраїнське об’єднання «Батьківщина» переменовати на Уліцю Василя Турянчіка, по славнім фотбалістови.

Мукачівська містьска рада днесь дементовала інформацію, котру сама пошырила на своїм офіціалнім вебсайті, а так само на офіціалнім конті на сіті Facebook. Пост, котрый быв на соціалній сіті вчера приданый, быв днесь пополідне оправленый, што видіти, кедь чоловік клікне, жебы видів історію посту.

Рада днесь подала інформацію, же Уліця Александра Духновіча не была і не буде переменована. Переменованя мало быти пропоноване іщі на минувшім засіданю, але депутатьскый корпус тото не підтримав. Рада так само звертать увагу на то, же переменованя уліць є выключна компетенція депутатьского корпусу, а не комісії.

Окрім того Мукачівска містьска рада припомянула, же в Мукачові в рамках першой етапы дерусіфікації была переменована централна площа на честь Александра Духновіча.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА