Сумар дня на 22. червця/юнія 2022 р.

Приносиме вам сумар медияльной ґрупы ЛЕМ.фм+ на ден 22. червця/юнія 2022 р.

На заході прошло одкрытя пропамятной таблиці посвяченой Лемкам

В понедільок, 20. червця/юнія, в Заменицях (в ґміні Хойнів) прошло торжественне одкрытя пропамятной таблиці посвяченой Лемкам, котры в наслідстві акциі «Вісла» мусіли оселити ся на обшыри ґміны Хойнів. Орґанізаторами подіі были війт ґміны Хойнів Анджей Пыж та грекокатолицка парохія Рождества св. Йоана Хрестителя в Заменицях. Подія проходила в памят 75. річниці выселінь Лемків з іх рідной землі. По богослужыню, принагідных перемовах і одкрытю таблиці в проґрамі дальшой части подіі была прелекция Юрия Стариньского о Лемках в контексті предків, родины, сусідів і знаємых та поетицко-музична част.

Дальше ремонтуют церков в Королику Волошскым

Зачал ся черговый сезон реновацийных робіт памятниковой, муруваной церкви в Королику Волошскым на східній Лемковині. Ремонтувана є баняста, цегляста повала полудньовой части олтаря. Роботы, орґанізуваны соспільниками – Стоваришыньом Королик Волошскій, ведены сут од 2015 рока, але проходят помалы. Проблемом сут грошы і брак фахівців. Дотепер одбудували дзвінницю, выремонтували повалу і дах церкви з трьома вежычками. В половині дах вкрытый є бляхом. На жаль планный технічный стан то не єдиный проблем церкви – злодіі вкрали уж ориґінальны ворота, а вырвали аж і краты з выглядів, в результаті чого знищыли і футрины. Грекокатолицка мурувана церков покровы Перенесіня Мощы св. Миколая в Королику Волошскым то єдиный видимый слід по выселеных Лемках і по спаленым вчас ІІ світовой войны селі. В часах Польской Народной Республикы храм замінили на маґазин поблизкого PGR-у Шкляры.

Русины молили ся вєдно з інчыма

16. червця/юнія тр. на праздник Поклонінія Пречыстым Тайнам Тіла і Кырви Ісуса Христа (Божого Тіла) прошла подія під назвом «Вєдно во Христі», вчас котрой єпарха Крижевацкой Грекокатолицкой Єпархіі, владыка Мілян Стіпіч стрітил ся з грекокатолицкыма вірныма Вуковарско-Сримской Жупы – містныма Русинами, Украінцями і Хорватами з Жумберка. Стріча зачала ся на Вуковарскым Меморияльным Цмонтери, де делеґациі положыли квітя і запалили свічкы перед памятником павшых хорватскых вояків гражданьской войны, котра проходила в 90. роках. По панахіді служыли архієрейску літургію. Участниками подіі были м.ін. русиньскы вірны і представникы русиньскых орґанізаций, котры пришли з такых сел як Міклюшевці, Вінковці ци Петровці.

Марка KARPATING признана дальшым продуктом і услугом

13. червця/юнія в Пияльни Мінеральной Воды в Высовій прошло вручыня цертифікатів локальной маркы KARPATING. Знак тот є потверджыньом, што даный продукт, услуга або ініциятива сут якістны і выріжняючы реґіон. Проєкт будуваня сесой маркы координує Локальна Ґрупа Діяня «Ґорлицкій Бескід». Є то так само форма промоциі реґіону серед туристів. Новы продукты, якы можут одтепер хоснувати знак маркы KARPATING, то м.ін. лікуючы воды з джерел Высовы: «Генрик», «Юзеф» і «Францішек» та натуральна мінеральна вода «Высовянка» од Курорту Высова. Едукацийном офертом з марком KARPATING остало познаваня мышпергачів ведене Зузанном Длуґош, што діє під марком Баба з гір. Продолжыня хоснуваня маркы KARPATING достал м.ін. Фестіваль «4 Страны Карпат» ци кулінарны варштаты традициной лемківской кухні реализуваны Стоваришыньом «Фраґмент Неба» з Лоси.

Фот. chojnow.pl