Сумар дня на 5. липця/юлия 2022 р.

Приносиме вам сумар медияльной ґрупы ЛЕМ.фм+ на ден 5. липця/юлия 2022 р.

Новый курорт на Лемковині

На Лемковині выокремили новый курорт – Злоцкє. Дотепер на обшыри ґміны Мушына фунґували два курорты: Мушына-Злоцкє та Жеґєстів. Тепер єст іх уж три. То евенемент на скалю Европы, кєд же Мушына стала єдином в Европі ґміном, котра має аж три курорты на своій обшыри. Внесок в тій справі вплынул до Міністерства Здоровля пару місяців тому, а уж 21. червця/юнія опубликували розпоряджыня Рады Міністрів. Шолтыствам: Злоцкє, Щавник і Астрябик надали статус «Курорт Злоцкє». Курорты на Лемковині знаны сут особливі завдякы властивостям мінеральной воды, што находит ся на іх обшыри. Тыкат тото і найновшого курорту. В найблизшым часі рушыт ремонт знаной санаториі Метальовец в Злоцкым. Обєкт має навязувати до модерністичного стилю 60. років ХХ ст.

В ґорлицкым повіті одновлят памятникы за понад чверт мілийона злотых 

Самоуряд Малопольского Воєвідства признал того рока разом 108 дотаций на суму 5,2 млн зл, цілю підперти консерваторскы роботы підниманы опікунами памятниковых обєктів в реґіоні. Вельо з того трафило до ґорлицкого повіту, тіж на Лемковину. Обшыр ґорлицкого повіту є евенементом на загальнопольску скалю. Ниґде веце неє такого нагромаджыня історичных перлин сакральной архітектуры, што сут на списку світовой спадковины UNESCO. На обшыри ґорлицкого повіту в найблизшым часі проведут роботы за веце як 250 тис. зл. Єдным з бенефіциєнтів є римокатолицка парохія покровы Божой Матери Неустанной Помочы в Устю Рускым. За 15 тис. зл зроблят консервацию плащаниці, што находит ся в лемківскій грекокатолицкій церкви покровы св. Параскєвы в Квятони. 20 тис. зл передали на консервацию заолтарной шафы з XVI ст. в костелі покровы св. Михала Архангела в Бінаровій. На консерваторскы роботы при церковных стародруках 15 тис. зл. отримат Єпархіяльный Осередок Православной Культуры «Ельпіс». Дальшы роботы ведены будут в памятниковых храмах на обшыри ґмін Санкова, Устя Рускє, Бобова. Продолжана буде м.ін. робота при консервациі іконостату в церкви св. Параскєвы в Новици.

Завершены інвестициі Бещадского Нацийонального Парку

Бещадскій Нацийональный Парк подал інформацию о актуально реализуваных інвестициях. Першым являт ся нова лавка на торфовиску в Тарнаві Выжній. Роботы при ній были завершены і місце єст уж доступне для одвиджаючых. Дале, завершены роботы при «Хатці Пухатка» на Ветлиньскій Полонині. Додатково плянуют там побудувати видоковый тарас і одновити ознакуваня шляків. Зовнішні роботы будут ведены іщы до вересня/септембра, але обєкт плянуют одкрыти уж в серпни/авґусті. Окремо, іщы в тым місяци Парк плянує одкрыти в Устриках Нижніх Природничый Музей. Додатково Парк поінформувал, же вшыткы шлякы і стежкы на обшыри Бєщадского Нацийонального Парку сут доступны до звиджаня.

Дальшы вакацийны стрічы в Маґурскым Нацийональным Парку

Маґурскій Нацийональный Парк просит на дальшы вакацийны стрічы. Дармовы природничы варштаты для діти проходят кажду вакацийну середу о 10.00 год. в Едукацийно-Музейным Осередку Маґурского Нацийонального Парку в Крампній. Для дорослых і родин працівникы зрыхтували цикль штотыжньовых прогульок по Парку. В тым тыжни прогулька рушат уж днес о 10.00 год. при церквиску в Жыдівскым. Додатково, парковый едукатор єст днес присутный од 9.00 до 15.00 год. на трасі Жыдівскє – стежка «Кычера» – Высокє. Про деталі дальшых прогульок будут інформувати на фейсбуковым сайті Парку.