Міністерство фінанцій хоче зрушыти узнесіня о реконштрукції музея Варгола

Мала то быти велика реконштрукція Музея модерного уменя Енді Варгола в Меджілабірцях. Но по трьох роках словацька влада їднать о зрушіню узнесіня, котрым ся на ню приділила дотація.

Хоць Пряшівскый самосправный край, котрый є зряджовательом Музея модерного уменя Енді Варгола бере реконштрукцію за вынтяково важну, на засіданя влады ся 13-го юла 2022-го року дістала пропозіція резорту фінацній, жебы зрушыти узнесіня о приділіню дотації на ню. Влада їднаня о тім пункті натеперь перервала.

Грошы схвалив іщі кабінет Петра Пеллеґріні

На велику реконштрукцію єдиного музея свого тіпу в Европі, і єдного з двох на світі, выділила грошы іщі влада Петра Пеллеґріні на своїм выїздовім засіданю в Кежмарку в октобрі 2019-го року в цілковій сумі 7,1 міліона евр.

Музей є в просторах будовы із 1980-років. В рамках великой реконштрукції планує оправити фасаду і просторы музея, прибудовати і надбудовати просторы. Будинок мать мати новы облакы, двері, стіны зо скла, підлогы, выминити ся має електроіншталація, воздушна техніка і сістема забезпечіня.

Перебудова має принести і розшыріня ґалерії а депозіту, выникнути мають новы ательєры, прибыти бы мали інтерактівны елементы, в планах є і простор про освітні проґрамы. Просторы ся подля проєкту мають розшырити о три штокы, чім має выникнути простор про розлічны конференції, мултімедіалны презентації, малы сценічны формы ці бісіды. На стрісі ся раховало з оддыховов зонов у формі амфітеатру.

Но ціны од 2019-го року наросли і музей днесь не знать зробити реконштрукцію за суму, котра была втогды владов схвалена.

Жупі залежыть на реалізації

„Пряшівскому самосправному краю залежыть на тім, жебы тот смыслуповный проєкт быв реалізованый. Тоту інвестіцую береме за вызначну і потрібну про затрактівніня міста і реґіону в повязаню з унікатностьов музея і його европскым значіньом, але і в повязаню з підпоров турістічного руху ці бізнісовы обставины на тій теріторії,“ повіла Даша Єленьова, говоркыня ПСК про аґентуру ТASR.

Проєкт раховав зо сумов 7,1 міліона евр. Но почас робліня проєктовой документації вдяка роснутю цін на ставебнім рынку підняли ся інвестічны вытраты проєкту о майже 80 процент, значіть на веце як 12,7 міліона евр.

„Схвалена подоба проєкту не є в сучасных обставинах реалізовательна, не мож сповнити ціль дотації при схваленых условіях, зато пропонує ся зрушіня даного узнесіня влады,“ пояснило Міністерство фінанцій пропозіцію на зрушіня узнесіня.

Подля Єленьовой край усвідомлює собі енормне нароснутя розрахунку, но його фіналну суму овпливнили „вонкашні“ факторы.

„Замір неґатівно овпливнило веце обстабин, головно пандемічна сітуація, войновый конфлікт на Україні, і з тым повязане скокове нароснутя ставебных цін,“ повіла Єленьова. Як підкреслила, без фінанчного крытя жупа не може підписати контракт на реалізацію ставбы, і зрушіня узнесіня влады бы край дістало до „цалком складной сітуації“.

З Міністерства фінанцій притім уж на рахунок Пряшівского самосправного краю пришло на реконштрукцію шість міліонів евр.

Мали сьте зачати скоріше, твердить резорт

Подля высловів Міністерства фінанцій мала жупа публічне обстараваня на проєкт выголосити вже скоріше, кедьже цілый замір выникнув іщі в 2019-ім році. Подля міністерства бы ся так не стрітили з актуалнов проблемов.

В припаді, же влада узнесіня зрушыть, резорт фінанцій рекомендує Пряшівскому самосправному краю жадати о фінанції знова. „Жадосьт Міністерство фінанцій наслідно штандартно оцінить у співпраці з Інштітутом вартости за грошы,“ інформовав резорт аґентуру. Як підреслив, край затля жадны грошы, котры вже дістав на реконштруцкію, не мусить вертати.