Приносиме вам сумар медияльной ґрупы ЛЕМ.фм+ на ден 19. липця/юлия 2022 р.
75. років православной парохіі в Михалові
В суботу, 9. липця/юлия, вірны православной парохіі св. Михала Архангела в Михалові на Нижнім Шлеску молитовно упамятнили 75. річницю выгнаня Фльоринчан з Лемковины і заєдно покликаня в новым місци прожываня православной спільноты. Лемкы з Фльоринкы трафили до Михалова 7. липця/юлия 1947 р. – заіхали гын 33 лемківскы родины з розладунковой стациі в Любіні. Тыжден перше до Михалова трафило 21 украіньскых родин з Жабча і Потуржына на Холмщыні. Фльоринчане такой одраз по оселіню на чужій земли зачали орґанізувати реліґійне жытя. Перше богослужыня в хыжы Дубеців в Михалові одслужыл о. Штефан Бігун. В 1989 р. жытелі Михалова побудували першу і до той поры єдину церков на чужыні, яка презентує західньо-лемківскій стиль. В богослужынях, окрем місцевого пароха, о. Адама Горбаля, взяли участ священникы сусідніх парохій вроцлавско-щеціньской єпархіі ПАПЦ. Коло церкви был посвяченый крест. Пак єден з Фльоринчан, Іван Дзядик оповіл о рідным селі і о початках михалівской парохіі.
Штораз ближе 42. Лемківска Ватра
Припоминаме, што в першый полный вікенд серпня/авґуста в Михалові на Нижнім Шлеску одбуде ся 42. Лемківска Ватра на Чужыні. [jingle_seweryjan]. І ту ватрян жде новум, кєд же само офіцияльне розпаліня ватры буде дакус пізнійше – як ся уж буде змеркало, так жебы з положыня огня під найважнійше огниско в році зробити шов. Інчом зміном в проґрамі буде тото, што офіцияльна част подіі одбуде ся в суботу, значыт в другій ден Ватры, а не як бывало то до той поры – в пятницю. В проґрамі подіі м.ін. концерты ансамблів Надія, Н’лем фольк, Вороны, Ластівочка, Кычера ци Coolбаба. Не бракне і споминів выселенців – осіб памятаючых тернистый 47′, кєд же в тым році споминаме 75. річницю выгнаня. Буде і нове місце – шатро, в котрым будут проходити дискусиі і стрічы з авторами книжок.
Фотоґрафічный конкурс о Команчы
Ґмінный Осередок Культуры в Команчы просит до участи в фотоґрафічным конкурсі пн. «Команецкы Перлины». То конкурс, якій є орґанізуваный в рамках реализациі проєкту під назвом «XXV Приграничны Стрічы Польщы і Словациі – благодійный концерт для Украіны». Конкурсова фотоґрафія повинна презентувати памятникы, атракциі, краєвиды, натуру ци інчы прекрасны місця, якы находят ся в ґміні Команча. Каждый участник годен прислати лем єдну знимку. Конкурсовы працы треба надослати до кінця липця/юлия на майля: gok@komancza.pl.
«Од Русаль до Яна»
Музей Лемківской Культуры в Зындрановій просит на остатній вікенд липця/юлия на подію «Од Русаль до Яна». По пандемічній перерві акция вертат до традицийной формы. В проґармі подіі находит ся м.ін. одвиджаня музею, выклады, прелекциі, конкурсы і ремісничы показы. Орґанізаторы задбали тіж о музичну оправу – на сцені запрезентуют ся м.ін. ансамблі Серенча ци Гудаци. В неділю одбуде ся служба божа в церкви св. Миколая в Зындрановій.