Сумар дня на 16. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 16. серпня/авґуста 2022 р.

Осіню зачне ся продаж 10 прац знаного артисты русиньского походжыня Енді Варголя

Выставлены творы Енді Варголя походят з часів студиюваня Варголя в Пітсбурґу, а продати іх рішыла родина артисты. Енді Варголь лишыл Пітсбурґ в 1949 р. і перенюс ся до Ню Йорка. Серед лишеных в родинній хыжы річы находили ся м.ін. працы зроблены артистом в часі студий. Пару з них презентували уж в Пітсбурґу ци на недавно закінченій медженародній обіздовій выставі «Andy Warhol: Lifetimes». Творами тыма опікувал ся найстаршый брат Варголя, а по його смерти образы в спадку достало його семеро діти, што рішыли о продажы. Колекция не буде зліцитувана на раз. Авкциі зачнут ся в листопаді/новембрі тр. і будут проходити што піл рока. На каждій з них продаваны будут 2 образы з цілой колекциі. Не знатя іщы, де пройдут авкциі, як подала родина артисты – дальше ведены сут бесіды з авкцийныма домами.

Осередок Еколоґічной Едукациі і Природничый Музей Бєщадского Парку єст уж одкрытый

По закінчыню модернізациі Осередок Еколоґічной Едукациі і Природничый Музей Бєщадского Парку в Устриках Нижніх зас єст доступный до звиджаня, разом з новыма експозициями. Ремонтуваны были так поміщыня в будинку, як і зовнішня страна ци просторы докола него. В серпни/авґусті закінчыла ся модернізация середины. Як мож прочытати на сайті парку, музей зыскал модерный і естетичный выгляд, а одтепер єст іщы ліпше пристосуваный до звиджаня для неполносправных. Експозициі збогатили ся о новы інтерактивны становиска, моделі ци макєты, што в атракцийный спосіб вказує природничу і культурову вартіст Бєщадского Парку. Єст тіж дашто для наймолодшых. Працівникы Парку припоминают, што ремонтовы роботы дальше тырвают, сут то м.ін. выміна даху ци аранжация просторів коло обєкту.

Уж в тым тыжни розпочне ся фестіваль «Карпатскы Климаты»

В найблизшый четвер зачне ся Фестіваль Культур Поґранича «Карпатскы Климаты». Орґанізуваный єст од років і тішыт ся великом популярністю. Тогорічна едиция пройде під гослом «В дорозі», што навязує до ансамблів і гости, котры жебы доіхати на фестіваль до Коросна, мусят быти в дорозі, тіж в часі подіі участникы будут ся переміщати по цілым місті, бо так сут заплянуваны атракциі. Орґанізаторы задбали не лем о дорослых, але і атракцийный час для діти. В проґрамі подіі находят ся концерты, варштаты для наймолодшых, карпатскій кєрмеш, конкурс на найліпшый хліб і наливку, прелекциі ци выставы, а аж і выступы театральных ґруп. В часі фестівалю участникы будут хоснувати вшыткы смыслы. Кольоровы кроі реґіонів, музика з ріжных стран Карпат, запах печеного хліба, смак локальных страв і дотык тканин. Фестіваль зачне ся 18. серпня/авґуста і тырвал буде до 21. Цілый проґрам подіі находит ся на сайті Реґіонального Центра Культуры Погранича в Коросні.

«Туристичны Скарбы Малопольщы»

Зачала ся четверта едиция конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. Конкурс складат ся з трьох етапів. Першый тырвал буде до 31. серпня/авґуста і треба зголошувати кандидатуры. На сайті Малопольского Воєвідства находит ся анкєта, через котру мож зголосити кандидата, та цілый реґулямін і вымогы, котры мусит сполняти. Як і в попередніх роках, змаганя пройдут в в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині.