Сумар дня на 19. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 19. серпня/авґуста 2022 р.

Консультацийны стрічы в справі будовы желізницьового получыня з Ліґниці до Ґлоґова

Фірма Infra, занимаюча ся документацийом при розбудові желізницьового получыня Ліґниця-Любін-Польковиці-Ґлоґів, разом з представниками власти заанґажуваных ґмін просит на цикль консультацийных стріч. Бесіды будут частю документациі для проєкту пн. «Будова желізницьовой леніі Любін-Польковиці-Ґлоґів разом з розбудовом леніі нр. 289 на одтинку Ліґниця-Рудна Ґвізданів». В рамках інвестициі плянувана єст будова новой леніі з Любіна до Польковиц і дале до місцевости Ґрембоціце або Ґавожыці, при выкорыстаню істнуючой леніі до Ґлоґова. Консультацийны стрічы пройдут во вшыткых заанґажуваных ґмінах. Зачнут ся 22. серпня/авґуста в Ліґници, пак будут м.ін. в Любіні, Ґлоґові і Польковицях. Стрічы закінчат ся 30. серпня/авґуста в Єжмановій. Серпньовы бесіды сут першым з трьох етапів соспільных консультаций в рамках проєктовой документациі. Другій етап заплянуваный єст на жолтен/октобер, товды выконавця представит внескы з першого етапу консультаций. На остатній етап буде треба пождати аж до липця/юлия 2023 р. Буде то презентация рекомендуваного вариянту до реализациі. Додатково выконавця документациі неодолга проведе анкєтове досліджыня мешканців, котрого цілю, так само як і стріч, буде провірити потребы і жаданя жытелів. Анкєты будут доступны по закінчыню серпньовых консультаций.

Стрічы з Лемківском Культуром в Ґожові

Припоминаме, што заран, 20. серпня/авґуста, в Ґожові Великопольскым одбудут ся ХVIII Стрічы з Лемківском Культуром, якы орґанізує місцевый Кружок Стоваришыня Лемків. Подія од років проходила осіню в ґожівскым театрі, но тым разом одбуде ся она літом в рамках шыршой акциі Dobry Wieczór Gorzów 2022. Вчас концерту на ґожівскым рынку выступлят Лемківскій Ансамбль Пісні і Танця «Кычера» з Ліґниці, ґрупа Русин Чендеш Оркєстра з Пряшівской Руси та ансамбль Бурян з Лемковины. XXVIII Стрічы з Лемківском Культуром одбудут ся завдякы дотациі Міністерства Внутрішніх Справ і Адміністрациі та Уряду Міста Ґожова Великопольского. Подія зачне ся о 19.00 год. На акцию просит ведучый Головного Заряду Стоваришыня Лемків Андрий Копча і ведучый Кружка Стоваришыня Лемків в Ґожові Йоан Ґаборек.

«Высова пахняча зільом»

Ґмінный Осередк Культуры в Устю Рускым з Ґміном Устя Рускє просят в найблизшый вікенд до курорту в Высовій на подію пн. «Высова пахняча зільом». В проґрамі найде ся дашто для каждого. Будут анімациі для наймолодшых, конкурсы на робліня вінків і прелекциі на тему зіля і його хоснуваня. В музичній части проґраму запрезентуют ся головні ансамблі з Низкого Бескіду, в тым дітячый ансамбль Терочка, што діє при Рускій Бурсі. Подія зачне ся в суботу, 20. серпня/авґуста, о 14.00 год.

Концерт ансамблю Wspak на Лемковині

Музей Дворы Карвациянів і Ґладышів просит на неділю – 28. серпня/авґуста, до грекокатолицкой церкви св. Космы і Даміяна в Бортным на концерт ансамблю Wspak. В проґрамі находят ся головно паралітургічны пісні аранжуваны до інструментів. Хоцкі не лем тото мож буде слухати в часі концеру, бо ансамбль в своім репертуарі має і пісні інспіруваны музиком зо східніх кресів і Лемковины.

«Звыкы і обычаі Лемків в мушыньскій державі»

Публична Бібліотека Міста і Курортной Ґміны Мушына просит на стрічу пн. «Звыкы і обычаі Лемків в мушыньскій державі». Подію вюл буде Кжыштоф Мачуґа. Прелекция пройде в Філіі в Жеґєстові, днес – 19. серпня/авґуста, о 16.00 год.