Сумар дня на 1. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2022 р.

Протест Лемків і наукового середовиска

Лемківска соспільніст протестує проти дискримінацийному проєктови, якій реализуваный єст через Обєднаня Лемків. Протест публикуєме на нашым сайті www.lem.fm. Писмо было перед двома днями послане до децидентів реализуючых Проґрам Активны Громадяне, взглядом проєкту Обєднаня Лемків пн. «Лемкы то мы» фінансуваного з реченого фонду. В єдній з части проєкту Обєднаня Лемків хоче провести в стох школах (!) прелекциі про історию, походжыня, достоменніст Лемків. Не треба ся ани додумувати, яку неправду зас буде шырила тота орґанізация – старчыт войти на сайт проєкту lemkowietomy.pl і почытати зрыхтуваны нима інформацийны пакєты. Окрем того Обєднаня Лемків свойом діяльністю неєднократно вказувало, што не респектує прав Лемків, а то хоц бы через одкрытя таблиці на стациі в Заґужанах, де стоіт, што вчас Акциі «Вісла» вывожено одтамале Украінців. Під протестом підписали ся декотры лемківскы орґанізациі і діячы та шырока ґрупа науковців (листу сиґнатарів найдете на нашым сайті).

Тырват ремонт вежы церкви в Пшемкові

Перед даякым часом зачал ся ремонт 45-метровой вежы на памятковій православній церкви св. Михала Архангела в Пшемкові, на Нижнім Шлеску. Модернізация може быти реализувана при фінансовым спертю Повітового Староства в Польковицях, Уряду Міста Пшемків та завдякы власным середкам місцевой парохіі. Вшыткы працы сут ведены при спілпрацы з Консерватором Забытків. Ремонтово-малярскы роботы будут тырвати до кінця вересня/септембра. Пшемківска православна парохія то єдна з найвекшых лемківскых парохій на чужыні, а і загально в Польщы. Сам храм был побудуваный в роках 1744-1746 як євангелицкій костел. По выгнаню Лемків на Нижній Шлеск, од 1949 р. єст православном церквю.

Вмер Михал Вархіл

30. серпня/авґуста 2022 р. на 82 році жытя помер Михал Вархіл, «будівничый» лемківскых церкви. Был то народный творця, думкодавця і орґанізатор найбільшой колекциі мініятур лемківскых храмів і хыж. Михал Вархіл вродил ся в 1941 р. в Крампній. Його дітинство перервала насильна депортация проведена в рамках Акциі «Вісла». Од 60. років ХХ ст. жыл в Ліґници. В 70. роках покійный зачал робити першы моделі лемківскых церкви і хыж. Через близко піл столітя власноручно створил 60-70 мініятур. Творил в більшости лемківскы обєкты, але в його колекциі находили ся так само церкви з Пряшівской Руси, Гуцульщыны ци Бойківщыны. Вархіл своі моделі творил в більшости на основі старых і сучасных знимок, архівальных документів і помірів. Колекцию вказувал на чысленных выставах. Похорон обуде ся в суботу, 3. вересня/септембра в грекокатолицкій церкви Успіня Пресвятой Богородициі в Ліґници. Початок богослужынь о 11.00 год. Вічна Йому Памят!

Персональны зміны во вроцлавско-щеціньскій єпархіі ПАПЦ

Як інформує канцелярия православного вроцлавско-щеціньского архієпископа Юрия, кінцьом серпня/авґуста тр. прошли персональны зміны односно пароха в церкви Благовіщыня Пресвятой Богородиці в Мальчыцях. Дотеперішнього завідувателя парохіі, о. Адама Горбаля, владыка Юрий звільнил з посады, а в його місце одделеґувал новорукоположеного о. Павла Ґоцко. Отец Адам Горбаль дальше єст парохом церкви св. Михала Архангела в Михалові (любіньскій деканат). Даякій час священник Горбаль обслугувал тоты дві лемківскы парохіі на західніх землях Польщы.