Сумар дня на 29. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 29. вересня/септембра 2022 р.

Стріча з Петром Трохановскым. О Віслі, о жытю, о Лемковині

Уж днес в Округовым Музею в Новым Санчы проходит авторска стріча з лемківскым поетом, писательом, діячом і реґіоналистом – Петром Трохановскым. Тема буде повязана і з Акцийом «Вісла», яка обняла і західню част Лемковины (Сандеччыну). В рамках стрічы презентуване буде другє выданя книжкы П. Трохановского, што являт ся щырым оповіданьом про долю того першого поколіня, якому не было дане прити на світ «Дома». Іде о книжку під наголовком «A wisła dalej płynie», другє выданя якой вказало ся як раз в тым році, на 75. річницю выгнаня (перше выданя было публикуване в 2007 р.). В центрі стрічы має быти Сандеччына (або як бесідуют самы Лемкы – Сандецка Русь) – важный реґіон в істориі Лемковины. Подія зачне ся о 17.00 год. Вступ платный символичну злотівку.

Ювілейна Лемківска Творча Осін посвячена Стефановскому

Уж в наступный вікенд одбуде ся ювілейна, ХХХ Лемківска Творча Осін. Подія того рока в першый ден (8. жолтня/октобра) пройде в Білянці, де припоминати будеме недожытых 90 років Павла Стефановского, вызначного лемківского діяча, політика, етноґрафа і поеты. О його жытю і творчости розповіст др габ. Олена Дуць-Файфер, проф. ЯУ, а найновшу публикацию з творчістю вітця представит др габ. Лідия Стефановска. В рамках принятого формату – другій ден пройде в просторах Руской Бурсы в Ґорлицях. Того рока запрошыня до участи в святі лемківской літературы приняли творці та особы, што єй пропаґуют, аж з Сербіі, Італиі, Словациі і ріжных части Польщы, в тым зо Шлеска (буде чытана і лемківска поезия в шлезскым языку). Орґанізаторами подіі сут Стоваришыня Лемків і Стоваришыня «Руска Бурса» в Ґорлицях.

На Словациі буде нова автострада і експресова дорога

Меморандум о спілпрацы підписали в понедільок, 26. вересня/септембра, обчаньскы здружыня Автострада на Зепмлин (Diaľnica na Zemplín) і Наш Пряшів (Náš Prešov) з Кошыцкым Самосправным Крайом і Пряшівскым Самосправным Крайом. Словацкій меморандум має служыти координациі активности напрямуваных на выбудуваня автострады Д1 (D1) по границю з Украіном, як і добудуваня експресовой дорогы Р4 (R4) по границю з Польщом. Спілпраца тыкат і выпрацуваня пропозиций на леґіслятивны зміны підтримуючы процес рыхтуваня будовы інфраструктуры доріг. На робочій стрічы схвалили Раду Самосправы при обчаньскым здружыню Автострада на Земплин, котра буде новым порадным орґаном. Членами рады стали пріматоры окресных міст і выбраны старостове сел з реґіону, котрого тото тыкат.

Уж в суботу радийовы варштаты для наймолодшых

А на конец припоминаме, што уж в найблизшу суботу, 1. жолтня/окторба, в будинку Руской Бурсы в Ґорлицях пройдут першы варштаты радийового кумшту для діти. Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля. А кєд найдут ся охочы молоды акторы, та вєдно з редакторами нашого радия награме радийове слуховиско. По школіню просиме на почастунок. Не маме віковых ограничынь. Хоц до початку акциі іщы лем два дни, фурт можете присылати зголошыня до участи діти в варштатах на майльовый адрес radio@lem.fm.