На ратунок Карпатам. Што годину зникат ліс велькости 5 футбольовых боіск

З Карпат, якы являют ся єдным з послідніх кавальців натуры і дикости в Европі, што годину зникат ліс велькости пятьох футбольовых боіск. То основа рапорту Greenpeace Polska, котрый был як раз опубликуваный на офіцияльным сайті орґанізациі.

Активісты в своім рапорті вказуют, што нищыня карпатскых лісів проходит головно з причыны неодповідальной лісовой господаркы. Greenpeace алярмує, што дотеперішні формы охороны не принесли стриманя вытинкы дерев, зато необхідный є новый, медженародный проґрам охороны Капрат, котрый буде хосенный для природы і люди, якы гын жыют.

А припомнийме, што велика част карпатскых лісів находит ся і на Лемковині – сут они од парох років реґулярно і з вынятковом скорістю вытинаны Державныма Лісами Польской Республикы.

Даны приносят сателіты

Рапорт пн. «Карпатскій Ліс: Загорожена Дідовизна» анализує сателітарны даны з карпатскых лісів – другого, што до велькости европейского гірского масиву, якій іде од Австриі і Чех через Польщу, Словацию, Мадяры, Украіну аж по Румунію і Сербію. В рапорті зазначат ся, што Карпаты окрем гір Скандинавіі і росийской тайґы то остатнє такє місце на карті Европы – полны сут вельовіковых і натуральных лісів.

На жаль, ситуация з рока на рік є штораз планнійша. Згідно з приведеныма даныма, в результаті діяльности чловека за остатніх двадцет років простір лісів в Карпатах зменшыл ся о  7350 км² . То штырі гектары або пят футбольовых боіск на годину.

Інформациі Greenpeace вказуют ся на два тыжні до початку самміту Орґанізациі Зъєднаных Наций, якій пройде в Монреали. На ним мают розправляти о біолоґічній ріжнорідности Землі. Активісты подают, што повинно быти гын підписане «нове, амбітне догваріня, жебы затримати загальносвітову природничу кризу, яка проявлят ся вымераньом ґатунків і нищыньом екосистемів».

На жаль, мимо голосных декляраций, державам Евросоюзу не подарило ся за остатніх десят років сполнити цілів охороны природы, а ситуация в Карпатах вказує, што іщы вельо треба зробити .

Польща ани не ліпша

Як подає Greenpeace, ситуация не єст добра і в Польщы, де простір лісів зменшыла ся о ок. 350 км² , значыт меньше-більше о обшыр Кракова. В 2020 р. з 13 надлісництв обнимаючых Карпатскій Ліс штоденні выізджало більше як 80 тяжкых авт з вытятыма деревами – часто такыма, якы мали уж памятковый характер.

Што цікаве, вшытко тото было можливе за справом побудуваня на обшыри польскых Карпат новых лісовх доріг. Іх сіт є тепер єдном з густійшых на світі. Дорогы тоты причыняют ся до ерозиі ґлебы і збільшают ризико залив.

Факт єст такій, што лем 3% карпатскых лісів є під стислом охороном. Ціла решта – 97%, єст загорожена дальшыма вытинками. Активісты Greenpeace Polska од років апелюют основати Турніцкій Нацийональный Парк ци тіж розшырити Бєщадскій Нацийональный Парк, але в місце охороны проходит нищыня лісів.

Одкаль тото знаме?

Хто жыє, або ходит часто по Лемковині, напевно достерігат, што од парох років з векшым насиліньом, як перше, робітникы Державных Лісів ведут вытинку і вывозят велику кількіст карпатского дерева. В тым чыслі старых дерев – засаджуваных нашыма предками.

Цінніст лемківского ліса є знана вшыткым нам – головно тым, якым лісы были беззаконно забраны, а потомны котрых старают ся о іх зворот. Лем на ранті спомнийме, што з причыны введіня неконституцийных змін новы справы о зворот нашых лісів не можут быти подаваны на суд.

Greenpeace закликує Европейску Комісию і уряды влады держав пильно выпрацувати плян, котрый дозволит обянти охороном значучу част Карпат, а заєдно – при унійным фінансуваню – створит обставины до гідного жытя для локальных соспільности.

Закля такій плян буде схваленый, польскій Greenpeace домагат ся скоро стримати вытинку і ввести 10-літню мораторию на будову новых лісовых доріг. Рапорт доступный за тым мотузком.