Русиньскы посланці ПСК стали членами културной і народностной комісії

В понедільок 13-го децембра 2022-го року засідало Заступительства Пряшівского самосправного краю (ПСК). Окрім іншого, як інформовав денник Korzár, посланці схвалили склад окремых комісій.

В рамках Заступительства ПСК буде в сучаснім функчнім періоді фунґовати довєдна десять комісій.

Суть то Комісія транспорту, Комісія културы і народностных меншын, Комісія справованя маєтку і інвестіцій, Комісія реґіоналного розвитку і турістічного руху, Комісія соціалных діл і родины, Комісія школства, молодежи, тілесной выховы і шпорту, Комісія теріторіалного планованя, охраны і творіня жывотного оточіня, Комісія здравотництва, Комісія мандатова і Комісія на охрану публічного інтересу при выконованю функцій публічных функціонарів.

Якраз до Комсії културы і народностных меншын дістали ся і русиньскы посланці, котры суть познаты через свої актівности в русиньскім русі.

Єдным з членів є Мартін Караш, якый быв зволеный за окрес Стара Любовня, і є членом посланецького клубу Hlas a nezávislí (Hlas і незалежны).

Караш є председом Русиньской оброды на Словеньску, веде Фолклорный ансамбель Барвінок з Камюнкы, де є і містным посланцьом, Словакію репрезентує і як член Світовой рады Русинів, а моментално є і шефом Любовняньского освітнього центра в Старій Любовні.

В комісії, котру веде як предсидателька Вєра Лещакова, докінця міг Караш мати посаду підпредседы. Но за його посланецькый клуб быв пропонованый на підпредседу іщі і далшый кандідат, Юрай Бохня, на основі чого Караш не прияв номінацію, кедьже, як інформує Korzár, хотів утримати єдность клубу. Бохня наконець і став підпредседом.

Другым познатым серед Русинів членом културной і народностной комісії є Михал Дідік, довгорічный староста села Чірч, так само зволеный до Заступительства ПСК за окрес Стара Любовня, і член клубу Spolu za región (Вєдно за реґіон).

До той комсії дістав ся і Михал Ільканин, зволеный за окрес Свідник, з єднакого клубу як Дідік. Ільканин, котрый є моментално предностом Окресного уряду у Свіднику, быв в минулости актором Театру Александра Духновіча. Так само модеровав много русиньскых подій, быв членом тіму, котрый выраблять проґрам Русиньскый маґазин в Радію і телевізії Словакії, і гого лице нераз могли сьме видіти і на білбордах ці іншых пропаґачных матеріалах в рамках різных кампаньовых акцій, котры робили Русины на Словакії.