«Слово» – Неділя блудного сына – неділя, 9.00 год.

Неділя блудного сына є другов недільов, котра нас приготовлять на святу добу посту. Говорить нам з єдной стороны о людьскім намаганю так повісти вырвати ся з рук доброго Бога, глядаючі фалшыву слободу без Бога, без Його заповідей.

Хотячі собі жыти цалком подля своїх пожадливостей, роскошного способу жывота а якы траґічны наслідкы мать таке рішіня. А з другого боку на безконечне Боже милосердя, на Його любов ку каждому, як Бог не хоче смерти грішника, але чекать на його навернутя, на зміну жывота.

Ісус Хрістос тото указує на прикладі отця, котрый мав двох сынів. Молодшый уж не хотів быти в домі отця, не хотів ся фурт обмеджовати нормами справованя в домі. Хотів собі ужывати жывота, іншыма словами, хотів мати владу над жывотом.

То є в образнім прикладі указане на просьбі розділити маєток міджі сынів. По ґреческы узіан – то, што сущне, основне. А отець їм розділив ґр. віон (жывот). То є, дав їм слободу розпоряджовати ся зо своїм жывотом як хотять.

Тот молодшый тото выхосновав і такой по куртім часі одышов, то є, зачав жыти подля свойой волі. Но скоро пришов на то, же тот, што го привабльовав до свойого царьства, є діавол, йому не може дати нич, лем голод а бідованя. Бо гріх не заспокоїть чоловіка, не дасть йому щастя. А так тот сын вошов якбы до себе, опамятав ся, здогадав ся, як то было радостно в домі отця, а прягне ся вернути. Вставать і іде, а тот отець його вызерать каждый день. Як го увидить прибігне, шмарить ся му на шыю, і такой наказує рабам: дайте йому перше облечіня, облечіня сынівства.

Тото робить Бог, так радує ся, вертать нам по гріху тото облечіня Божой дітины. Чекать на нас, тихенько дуркать на двері нашого сердця, і ніжно ся пригварять: Верний ся назад з той країны смерти і гріха ку мі. Я тя знова прийму. Не вытыкам тобі жывот перед тым.

Ку тому нас кличе і днешня неділя. Приймийме тото позваня нашого доброго Господа і Спасителя, котрый не хоче смерти грішника. Но жебы ся покаяв і жыв вічно. Слава Ісусу Хрісту!

В неділю, 12. фебруара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. фебруара 2023 р. о 12.00 год. і 13. фебруара 2023 р. о 2.00 год. за русиньскым часом.