В посліднім одтинку Обзерача Природы дознали сте ся, чым сут і як возникают глубинны маґмовы скалы. Тепер пришол момент, жебы вказати Вам штоси противне – ефузивны скалы. Такы, што звязаны сут з експлозиями вульканів і што творят великы базальтовы (і не лем) поливы в вельох закутинах світа, а колиси творили такы тіж і в самых Пєнінах!
Побавиме ся в дослідників і призриме ся ефузивным маґмовым скалам, якы мож стрітити в околицях Щавниці і Шляхтівской Руси. Як выглядали пєніньскы вульканы? Ци творили конусы збудуваны з застынутой лявы? Коли проходили процесы іх творіня? І, вкінци – кус жартобливі, ци міг іх памятати даякій Лемко?
Одповіди на тоты звіданя глядайте в найблизшу пятницю 20. листопада/новембра о 13.00 год. Проґрам буде повтаряный в суботу 21. листопада/новембра о год. 7.30 та в середу 25. листопада/новембра о год. 4.30.
До стрічы на ґеолоґічным шляку!
Ґеолоґічный словник:
skały magmowe wylewne – ефузивны маґмовы скалы
bąbelki – булькы
pumeks – пумекс/пемза
płaszcz Ziemi – плащ Землі
skorupa ziemska – земна кора
stożkowy kształt – конусова форма
Джерело знимкы: Wikimedia Commons, Alet123, CC BY-SA 4.0







