Сумар дня на 10. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 10. лютого/фебруара 2023 р.

Выбраны члены Комітету Моніторуючого Европейскы Фундушы

Сімнадцет позаурядовых орґанізаций з малопольского воєвідства найде ся в Комітеті Моніторуючым Европейскы Фундушы для Малопольщы 2021-2027. Полный список підметів разом з чыслом голосів є поданый на сайті малопольского Бюлетину Публичной Інформациі. Найбільше чысло голосів отримали Одділіня Воєвідского Звязку Охотничых Пожарничых Стражы ПР Малопольского Воєвідства, Стоваришыня Мосткы Разом і Малопольска Сіт LGD. Комітет є незалежным опінійодавчо-порадным орґаном і є єдным з вымогів реализациі проґраму Европейскы Фундушы для Малопоьщы 2021-2027. Окрем позаурядовых орґанізаций будут в ним представникы заряду малопольского воєвідства, орґанізаций єдиниц територияльного самоуряду і урядовой стороны.

Рушают записы до Европейского Бігового Фестівалю

О тыжден, 17. лютого/фебруара рушают записы до ІІІ Едициі Европейского Бігового Фестівалю – Два Бескіды. Тогорічны змаганя будут проходити в Креници в днях од 30. червця/юнія до 2. липця/юлия. Зрыхтуваных єст 6 дистансів: 100, 60, 42, 25, 10 і 5 кілометрів і додатковы бігы для діти. Фестіваль буде в тым році вынятковый, м.ін. зато же в тым самым часі в Креници будут ся одбывати дакотры змаганя в рамках Европейскых Ігр Краків-Малопольща 2023. Єдном з конкуренций будут і гірскы бігы. Як подали орґанізаторы фестівалю, найдолшый дистанс «Креницкя Сотка» буде бігом розгрываным в рамках ІІІ едициі Европейскых Ігр, в котрым може выстартувати каждый, без вынятку. Буде єдна клясифікация для вшыткых стартуючых. Більше про записы найдете на фейсбуковым сайті Европейского Бігового Фестівалю.

ІV Лемковина Вінтер Трейль

А уж заран пройдут бігы в рамках черговой, четвертой уж едициі змагань Лемковина Вінтер Трейль. Тым разом базом змагань буде Івонич, але старты двох найдолшых дистансів (33 і 55 км) будут з Яслиск. Як обіцюют орґанізаторы, одкрыют перед участниками чысто новы закутины Низкого Безкіду, якы не сут знаны з осінньой едициі бігів. Вшыткы інформациі найдете на інтернетовым сайті ultralemkowyna.pl. При нагоді, фурт тырвают записы до черговой осінньой едициі Лемковина Ультра Трейль, яка в тым році пройде в днях од 20. до 22. жолтня/октобра. Зрыхтуваных єст 5 трас. Найдолша (150 км) буде мала страт в Креници, дальшы трасы (100, 70, 48 і 30 км) будут ся зачынати в Івоничы, Гыровій і Выжніх Пулавах. Метом вшыткых дистансів буде Команча. Партнетом подіі є Підкарпатскє Воєвідство.

Др габ. Олена Дуць-Файфер отримат нагороду Курпівского Непомука

Др габ. Олена Дуць-Файфер, проф. Ягайлоньского Університету, отримат званя Почестной Громадянкы Ґміны Кадзідло і нагороду Курпівского Непомука. Як подал в писмі війт ґміны Кадзідло Дариюш Лукашевскій, тоты выріжніня каждорічно адресуют до осіб, якы через м.ін. свою працу, конкретны проєкты, мудре плеканя минулости, пошану для локальных соспільности, знаня будувати дозрілы реляциі сут для них недосягненым взірцьом, до якого все можут ся одкликати і хоснувати, особливо в трудных і неспокійных часах. Тогорічны торжества переданя нагороды і званя одбудут ся підчас традицийного Курпівского Весіля. 17. червця/юнія выріжнены возмут участ в панелю, в часі якого оповідят о своій публичній діяльности, пасиях, духовых зобовязанях. В неділю 18. червця/юнія пройде торжественна Рада Ґміны, на котрій будут приняты одповідні постановы і вручены памятковы дипломы. Нагорода Курпівского Непомука буде вручена на початку весільных обрядів в Курпівскій Загороді.