Сумар дня 3. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 3. квітня/апріля 2023 р.

Анкєта про транспортовы потребы жытелів ґорлицкого повіту

Повітове Староство в Ґорлицях просит выполняти інтернетову анкєту про транспортовы потребы жытелів ґорлицкого повіту. Результаты будут помічны для рыхтуваня повітового пляну публичного громадяньского транспорту. В анкєті сут примірно звіданя о ґміну або повіт, з якых подорожуєме до Ґорлиц, і частоту подорожы, тип транспорту і білетів, ціль подорожы і час та кілько місячно можеме платити за доізд громадяньском комунікацийом до працы або школы. Звідуют тіж, ци ціны білетів, частота курсів або стандард подорожы могли бы влинути на зміну середків транспорту. Жытелі сут звідуваны і, якы желізницьовы получыня повинны быти подля них одкрыты. Кєд іде о реґіональны получыня – сут то курсы зо стациі Ґорлиці Заґужаны – Краків, з можністю дальшой подорожы в сторону примірно Варшавы, Ґданьска, Щеціна та зо стациі Ґорлиці Заґужаны, з можністю дальшой подорожы в сторону примірно Люблина, Перемышля. Сут і штоденны і туристичны локальны получыня на трасі Новый Санч – Сторожы – Ґорлиці – Біч – Ясло, і курс Ґорлиці – Ґорлиці Заґужаны. В анкєті мож тіж зголосити увагы тыкаючы транспортовых услуг. Анкєту мож выполняти до кінця червця/юнія тр.

Музей Лемківской Культуры в Зындрановій зас одкрытый

На фейсбуковым сайті Музею Лемківской Культуры в Зындрановій явила ся інформация, што од 1. квітня/апріля, по трьох місяцях перервы, Музей взновил діяльніст і зас єст одкрытый для туристів. Як результат зменшыня квоты дотаций отримуваных з Міністерства Внутрішніх Справ і Адміністрациі на підметову діяльніст, як і цільовы задачы, інституция не могла фунґувати на дотеперішніх условіях. Середкы были не выстарчаючы для утриманя і діяльности єдиниці як музейной інституциі, зато Музей Лемківской Культуры рішено заперти на період од 1. січня/януара до кінця марця 2023 рока.

Неодолга побудуют біциґльову стежку з Ропы до Шымбарку

До кінця червця/юнія тр. ґміня Ропа в порозумліню з війтом ґміны Ґорлиці выбудує роверову стежку до каштелю в Шымбарку. Стежка є елементом шыршой задачы тыкаючой будовы біциґльовых стежок на обшыри ґміны Ропа. Траса буде ся зачынала за будинком Уряду Ґміны і вела вздолж рікы Ропа в сторону Шымбарку. Доцільово стежка получыт ся з уж істнуючом трасом Ґорлиці – Шымбарк. В дальшых роках ґміны плянуют выдолжыти біциґльову трасу до резервуару в Климківці.

В Ґорлицях появили ся е-ролеры TIER

Як подал Містецкій Уряд в Ґорлицях, 1. квітня/апріля на улицях міста появили ся е-ролеры TIER, якы мают быти выгідном і беземісийном альтернативом транспорту в Ґорлицях. Удоступненых єст 150 поіздів. Так як в припадку інчых середків транспорту, хоснуючы е-ролера треба дотримувати локальны переписы і шанувати другых участників руху. Подля обовязуючых переписів, до ізды на електричным ролері служыт предовшыткым роверова дорога або пас руху для біциґлів. Кєд не сут доступны, мож порушати ся улицьом з обовязуючым ограничыньом скорости до 30 км/г. Кєд неє роверовой стежкы, а на улици ограничыня скороти то понад 30 км/г, мож ся переміщати тротуаром, при чым не мож утрудняти руху пішым, але уступувати ім і порушати ся зо зближеном скорістю.