Сумар дня 6. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 6. квітня/апріля 2023 р.

Нова «Бесіда»

Вказал ся другій тогорічный номер двомісячника Стоваришыня Лемків – «Бесіда», ч. 2 (191) за місяці марец/квітен 2023 р. Часопис явил ся друком такой перед Великодньом, так жебы сме могли собі на тот святочный час почытати рідне слово. В «Бесіди» прочытаме м.ін. статі Петра Медвідя о вмерлым Юраю Якубиско, Наталиі Малецкой-Новак о гляданю експертів в Ґміні Устя Рускє і інтервю з Давидом Здобыляком, допис Северияна Косовского о Studium Carpatho-Ruthenorum 2023 та вынятковым фільмі о ансамбли «Лемковина». Сут тіж принагідны статі (до округлых річниц) – о Духновичу, Долговичу ци лемківскых альманах – значыт «Лемківскых Календарях», пак названых «Лемківскыма Річниками», котры выдає каждый рік Стоваришыня Лемків. Часопис єст доступный до придбаня тіж в версиі онляйн – на сайті Стоваришыня Лемків.

Свидник містом з русиньскыма означынями

Припоминаме, што Русины на Словациі до марця тр. мали лем єдно місто, в котрым витала нас назва по русиньскы – Меджелабірці. Тото ся змінило вдяка остатньому списуваню жытелів, а так само новому заряджыню влады, котрым ся выдає список нацийональных сел і міст. Одтепер уж не лем Меджелабірці, але і Свидник має таблицю зо свойом назвом по русиньскы, а будут і дальшы публичны означыня, такы як назвы урядів, публичных будинків ци улиц. Русиньскій язык стал урядовым в місті. Кєд же Свидник стал ся офіцияльні і русиньскым окресом, урядова комунікация по русиньскы, написы, основны інформациі сут ґарантуваны і на тым рівни урядів. Заохочаме при нагоді зайти до Свидника і видіти, як по нашому є означене місто. О намаганях свидницкых Русинів привернути місту істинный русиньскій дух, а і о приданю му назвы по русиньскы заохочаме чытати в статі на нашым портали.

Ремонт капличкы в Долгым

Фурт заохочаме доложыти цеголку до ремонту лемківской капличкы в селі Долгє. Была она в 2012 р. вступні зложена волонтерами, але тепер зас вымагат зложыня, вычыщыня і консервациі. В рамках ремонту дороблены будут бракуючы елементы: камінна куля, метальовы дверці і кутый крест, а в середині буде поміщена ориґінальна фіґура Божой Матери з Дітином, якій будут привернены головы. Капличка была фундувана Михалом Кусайлом в 1869 році. Обєкт не має ниякых одповідників, є свого рода твором лемківскых каменярів. Єст єдным з найстаршых на Лемковині. Середкы на ремонт і консервацию капличкы сут збераны в соспільній колекті на сайті zrzutka.pl. Передвидуваный кошт вшыткых робіт то 20 тис. злотых. На тот момент зобрано кус більше як чверту част середків. Ремонт проведе Шымон Моджеєвскій, основатель Стоваришыня Маґурич.

Стріча експертів дс. охорны меншыновых языків

В днях 27.-31. марця в Польщы гостила делеґация Комітету Експертів дс. Европейской карты реґіональных або меншыновых языків. Цілю стрічы было оцініня проґресу Польщы в охороні і промоциі реґіональных і меншыновых языків. Делеґация провела стрічы з представниками тых, якы хоснуют меншыновы або реґіональный язык. Такы стрічы одбыли ся нп. в Ополи, Варшаві і Білымстоку. Лемківску меншыну і лемківскій язык представлял вчас єдной зо стріч Даміян Трохановскій. Была то уж четверта моніторуюча візита Комітету в Польщы. На звіданя експертів одповідали м.ін. представникы міністерств, Головного Статистичного Уряду ци Державной Рады Радийофоніі і Телевізиі.

Христос Воскрес!

Вшыткым слухачам радия лем.фм і чытачам порталю, Русинам і не-Русинам, якы праздник Воскресіня Христового витают за григорияньскым календарьом, желаме вельо здоровля, радости і спокійного світлого періоду Великодня. Най тоты свята зобудят в нас надію на тото, што заранійшній ден буде ліпшый, што зо світа будут доходити до нас штораз то ліпшы вісти. Желаме родинного святкуваня і миру. Христос Воскрес! – желат редакция ЛЕМ.фм.