Сумар дня на 18. мая 2023 р.

Приносиме вам сумар медияльной ґрупы ЛЕМ.фм+ на ден 18. мая 2023 р.

Од наступного тыжня стартує Русиньскій Фестіваль

В наступным тыжни зачынат ся 11. едиция Русиньского Фестівалю во Свиднику. Буде він тырвал од 22. до 28. мая. То найбільша русиньска пленерова подія во світі, на якій презентувана є автентична русиньска культура, а при тым і єй модерны виды. Традицийно проґрам фестівалю зачне ся уж в понедільок. Каждого дня аж до пятниці будут проходити товаришучы подіі. В вікенд в свидницкым амфітеатрі буде мож позерати на концерты русиньскых ансамблів, але і запрошеных сусідніх колективів. Приміром, в пятницю, 26. мая о 20.00 год. на сцені запрезентує ся єдиный професийный русиньскій фольклорный ансамбль PULS. Через цілый вікенд выступувати будут і дальшы нашы русиньскы колективы, а на каждый вечер рыхтувана єст забава при музиці домашніх гудаків. Заохочаме до участи!

Іщы лем кус і… «Лемківскє Літо» в Чмелю

В суботу 10. червця/юнія одбуде ся в Чмелю на Нижнім Шлеску дальша едициі подіі пн. «Лемківскє Літо», яка єст орґанізувана православном парохійом св. Тройці в Любіні. Подія, як все, одбуде ся на сельскым спортовым пляци. Зачне ся о год. 14.00. В проґрамі м.ін. выступы лемківскых і сусідскых ансамблів. В тым році буде несподіванка, кєд же на подіі выступит єден з ансамблів з Лемковины. Окрем того буде мож покоштувати традицийны лемківскы стравы, што зрыхтуваны будут місцевыма ґаздынями, будут і атракциі для діти, а тіж конкурсы лемківской співанкы і рецитациі. О детальным проґрамі будеме іщы інформувати.

Любовяньскій град перейде дальшу модернізацию

Як інформує Одділіня Комунікациі Пряшівского Самосправного Краю (ПСК), град Любовня перейде дальшый ремонт. Тот буде тыкал пілнічно-східньой стіны і третього двору. Тота нацийональна культурна памятка, котра находит ся над містом Стара Любовня, здобыла на проєкт одновы фінсовы середкы з Міністерства Культуры Словациі, а тіж од ПСК. Цілковитый кошт дальшого етапу модернізациі выносит 1,217 мілийона евро. В рамках той фазы будут сохранены воєнны касарні з XVII ст., а дальшы археолоґічны одркытя будут мати еспозицию при схоснуваню модерных технолоґій. Проєкт допоможе і презентациі старой студні. Реконструкция любовяньского граду має м.ін. за ціль притягнути туристів в тоту част Словациі.

Стріча в Репеди

Днес в полудне проходит в Репедскым Осередку Культуры стріча з др. Губертом Оссадником і Лукашом Байдом – авторами публикаций, што тыкают м.ін. Лемків і обшыри Лемковины. Будут они як раз оповідати о своій найновшых выданях. Др Оссадник єст автором м.ін. книжкы пн. «Медже Ославом а Ясьолком», яка тыкат темы східньой Лемковины в меджевоєнным періоді. Лукаш Байда запрезентує своі книжкы о Бєщадах. На днешню стрічу просят Ґмінный Осередок Культуры в Команчы, Публична Бібліотека в Репеди та Выдавництво Лібра, котре печатало книжкы обох прелеґентів. Рецензию публикациі «Медже Ославом а Ясьолком. Східня Лемковина в роках 1918-1939» чытайте на нашым портали.