«Слово» – Праздник Вознесенія – неділя, 9.00 год.

Ісус Хрістос штиридцять днів перебывав зо своїма учениками. Учів їх о царьстві небеснім, різныма чудесныма ділами доказовав їм, же жыє. Як перешло штиридцять днів, взяв їх на гору Оливну, одкы ученикы мохлы увидіти єднак Гетсіманьску загороду, де быв Ісус поїманый, могли увидіти і Голгофту і порожній гроб.

Могли порозумити куртость як земного щастя, так і земного терпіня. Коли Ісус їх там завів, повів їм: Дана мі вшытка влада на небі і на землі, ідьте до цілого світа, учте вшыткы народы, хрестите їх і научайте сохраняти вшытко, што я вам наказав. Я з вами по вшыткы дні аж до кінця світа! І благословив їх, і возніс ся до неба. Они ся з великов радостьов вернули до Єрусалима!

Дорогы радіослухачі, слова, котры Ісус адресує ученикам, адресує і нам, я з вами по вшыткы дні, то є тота радостна новина і про нас. Бог є з нами. Ісус з тілом возніс ся до неба, но перебывать з нами. Ангелы говорять апостолам, што стоїте і смотрите до неба? Тото саме говорять і ку нам, жебы сьме мали очі нашой душы напрямены ку небу, жебы все памятати на куртость і поминаючость того земного а вічность небесного. Жебы нашы тілесны очі мати напрямены ку нашому ближньому, приготовлены йому послужыти, знаючі, же тым служыме самому Хрістови, котрый наше добре діло зроблене ближньому приписує собі.

А быти наповнены радостьов, бо земне терпіня, болести, трапліня, пронаслідованя, скоро поминуть а нас чекать велика слава небесного царьства, коли вытримеме у вірности Госпду до кінця. А быти наповнены радостьов, же маме такого Господа, тагохо владыку, такого царя, а же можеме йому належати і йому служыти.

А же нам приготовив такы добра, котры людьске око не виділо а ухо не чуло. А тота правдива духовна радость най каждый день наповнює вашы сердця. Слава Ісусу Хрісту!

В неділю, 28. мая 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. мая 2023 р. о 12.00 год. і 29. мая 2023 р. о 2.00 год. за русиньскым часом.