«Слово» – Неділя вшыткых святых – неділя, 9.00 год.

Неділя вшыткых святых є першов недільов по Сошествії Святого Духа. Днешній день Свята Церьков прославлять вшыткых, котры завершыли дорогу свойого земного жывота і стали ся жытелями неба.

Кедь сі даме вопрос, хто то суть тоты святы, яка думка нам приходить, коли чуєме слово святый? Може подумаме на подвигы великых мучеників Церькви, котры проляли свою кров за Хріста і Його слово. Протерпіли великы мукы, но не одрекли ся од Хріста.

В нашім літурґічнім календарю маме справды много такых святых. Або сі представиме монахів, пустынників, котры зохабившы тот світ захотіли жыти лем про Бога. Перетерпіли бурі спокушінь, но зістали тверды і теперь ся радують у вічній блажености. А може перед нашыма очами повстануть великы святителі і учітелі Церькви або великы чудотворці. Тым вшыткым правом належыть то слово святый.

Но дайме сі вопрос, односить ся тото слово і ку мі? Є то актуалне і про мене? Кедь розумиме святость як мученицьтво, строгый аскетічный жывот одлученый од світа або творіня чудесных діл, тогды сі можеме повісти – то є про мене далеко. Но ці справды в тім є лем святость?

Тото суть лем средства, но не святость. Святость є в любви ку Богу. На каждім місці, в каждім часі Його прославляти, повнити Його святу волю, жыти подля Його заповідей. А якраз тото ся маме учіти на прикладах того великого множества святых, котрых жывоты собі чітаме. Бо і рішіня проляти кров за Хріста, перетерпіти мукы, ці переслідованя, ці выгнаньство, або строгый аскетічный жывот – тото вштко выростало із щірой любви ку Богу і ближньому.

А так каждый будьде ся находить, в каждій сорті роботы може быти святый. Ці є хтось дома, робить денно-денні роботы, котры може ани не є видно, може не суть оцінены – як стараня о обыстя, о дітей, прятаня, варіня… Або є хтось учітельом, робітником, вояком або директором фірмы – каждый може на своїм місці зростати і іти ку святости.

Так днешна неділя нас позывать – будьте святы, зростайте в любви ку Богу і ближньому. Тото діло робить в нас Святый Дух, котрый нас надхынать ку любви і веде по дорозі ку святости.

В неділю, 11. юна 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. юна 2023 р. о 12.00 год. і 12. юна 2023 р. о 2.00 год. за русиньскым часом.