Сумар дня на 26. липця/юлия 2023 р.

Приносиме вам сумар медияльной ґрупы ЛЕМ.фм+ на ден 26. липця/юлия 2023 р.

Олтар і ікона – як новы

Підкарпатскій Воєвідскій Консерватор Памятників в Перемышли передал інформацию, што выпосажыня православной церкви Успіня Пресвятой Богородиці в Щавным (што находит ся на східній Лемковині) переходит консервацию – конкретно – роботы ведут при запрестольным олтари. Закінчыли першый етап робіт – іх закресом обняли ретабулюм і звінчыня олтаря вєдно з прикрашаючыма елементами. Обєкт на час консервациі здемонтували, выщыстили, усунули додатковы верствы фарб, зліпшыли конструкцию, дерево заімпреґнували, выполнили бракы. Заховавчу консервацию зробили тіж іконы Богородиці з Дітятком – повело ся одкрыти і выекспонувати ориґінальны малярскы верствы і ґраверуваны золочыня на фоні. Церков в Щавным была вознесена в роках 1888-89 через теслю Гойсана з Полонной. Находит ся на підкарпатскым Пути Деревяной Архітектуры.

Кілько синичок? А кілько шковранків?

Перед парома днями зачал ся тримісячный табір рахуваня птахів, орґанізуваный Стоваришыньом Карпатіка. Досліднича стация, де іманы і рахуваны сут птахы, находит ся в долині села Розстайне, якє тепер находит ся в обшыри Маґурского Нацийонального Парку. В ґрупі рахуючых находит ся ліценцийонуваный обручкар птахів, але фурт потрібны сут вольонтеры до помочы. Мож зголошувати свою участ через специяльный формуляр, тіж в лемківскоязычній версиі. Цілю веденых непрестанно од 1998 рока Стоваришыньом Карпатіка бадань є познати механізмы міґрациі птахів і причынити ся до іх охороны. Жебы мочы порахувати птахы, імают іх в специяльны орнітолоґічны сіти. Пак переносят іх в специяльных мішочках до головного шатра, там означают вид, обручкуют і міряют птаха. Даны з помірів трафляют до базы, котру веде Державна Централя Обручкуваня Птахів в Ґданьску. Виды птахів, котры од років рахуваны сут на обшыри Лемковины, то м.ін. водны косы/плющы, зимородкы/морозюкы, гірскы плискы, сычы воробинны ци уральскы совы. Табір рахуваня птахів буде тырвал іщы до 29. жолтня/октобра.

Чергова орґанізация влучат ся в сохраніня Мысцовы перед заляньом

В Мысцовій, невеличкым селі в серци Лемковины, зараз на граници Маґурского Нацийонального Парку і чысленных обшыри Натура 2000, од веце як сто років хотят побудувати таму. З тым вяже ся заляня 400 гектарів цінных просторів і чысленна експроприяция жытелів. Сенс будовы запоры підважат част жытелів і чысленны експерты, котрых в протестах проти тамі підперал м.ін. колектив Сестры Рікы. Тепер в охорону лемківского села з цінном природом і єй соспільністю заанґажувала ся чергова орґанізация – Стоваришыня Етноґрафічна Працовня. Хоче вказати, як вельо цікавых історий мож найти на обшыри заплянуваній до заляня – будут зберати істориі о Мысцовій і разом з Анном Хмєль, краківском артистком заанґажуваном в справу Мысцовой, творити мапу села. Незалежні од дальшой доли місцевости, буде то єден з нечысленных документів тыкаючый локальной спадковины. Жебы зреализувати тоту думку, орґанізаторы просят о фінансову підпору – на сайті zrzutka.pl доступна є соспільня колекта пн. Więc chodź, skomplikuj swój świat… z Pracownią Etnograficzną. Єдным з плянуваных до зреализуваня проєктів є як раз: Найдме ся на мапі Мысцовы.

Тыжден Позитивных Ініциятив в Ґорлицях

В тыжни од 31. липця/юлия до 5. серпня/авґуста в Ґорлицях продйе Тыжден Позитивных Ініциятив. Того рока орґанізаторы заплянували серию геппенінґів і акций на обшыри міста, а важным пунктом проґраму буде профіляктика узалежнінь та підпертя діти і молодежы в борбі з депресийом і заниженом самооціном. Штоден будут проходити розмаіты занятя і атракциі для діти (м.ін. спортовы, артистинчы і інчы), о 16.00 год. буде проходила головна подія дня, а вечерами веденый буде Молодіжный Клюб Контраст. На суботу 29. липця/юлия заплянуваный є родинный пікнік з атракциями, з концертом ґрупы TGD. Протягом Тыжня Позитивных Ініциятив сеньоры і схворены особы, будут мочы схонувати поміч вольонтерів в домашніх роботах, напр. мытя выглядів ци трепаня диванів. Орґанізатором цілой подіі є Стоваришыня Понад Ограничынями, партнером є м.ін. місто Ґорлиці і Пятдесятницка Євангелична Спільнота (поль. Ewangeliczna Wspólnota Zielonoświątkowa).