Сумар дня на 8. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 8. серпня/авґуста 2023 р.

«Літня академія лемківской культуры»

В тым тыжни в Радваницях в польковицкым повіті одбуде ся «Літня академія лемківской культуры». На цикль стріч, котры будут проходити в днях од 9. до 13. серпня/авґуста, просит Дом Культуры в Радваницях. Першого дня, в середу, в Домі Культуры буде мож слухати прелекцию пн. «Лемкы сут серед нас», а наступны стрічы будут тыкати кулінарий і малюваня батіком. В суботу на пляци при Ремізі Охотничной Пожарничой Стражы в Радваницях одбуде ся інтеґрацийне огниско з танцями і лемківском музиком. Академію завершыт в неділю концерт лемківского Ансамблю Пісні і Танця «Ластівочка».

«Оддайте язык дітям»

Німецка меншына фурт апелює о приверніня трьох годин тыжньово німецкого материньского языка в школах. На Опольщыні акция пн. «Оддайте язык дітям» тырват уж од двох тыжнів. Більборды з тым написом находят ся при дорогах в опольскым воєвідстві і приватных домах в реґіоні. Ведучый Звязку Німецкых Соспільно Культуральных Стоваришынь в Польщы Рафал Бартек подал, што ограничыня тыкат 55 тис. діти в реґіоні. За його словами, єст то «елемент антинімецкой реторикы уряду перед осінніма выборами» і «дискримінация власных громадян, котра перейде до істориі як барз ганебна карта політикы». Політикы ПіС, в тым чыслі міністер едукациі Пшемыслав Чарнек, як причыну ограничыня фінансуваня лекций меншынового німецкого языка вельократно подавали брак рівновагы в однесіню до браку державного фінансуваня лекций материньского языка для Поляків жыючых в Німцьох, при чым Полякы не сут там формально нацийональном меншыном. Уж перше тоту квестию пояснил полномічный уряду Німец дс. переселенців і нацийональных меншын Берндт Фабрітюс, котрый ствердил, же брак федерального фінансуваня выникат з ріжниц медже польскым і німецкым системами шкільництва – в Німцьох едукация єст справом звязковых краів і фінансуваня одбыват ся на рівни ляндів. Подля Фабрітюса оскаржыня політиків ПіС сут оперты на неправді, бо звязковы краі выдают річні на вчыня польского языка около 200 млн евро. Мимо шырокой скалі, покля што протесты не приносят ефектів, а оферта лекций материньского німецкого языка остає ограничена на наступный шкільный рік.

«Ден з Юрийом Новосільскым»

В пятницю 18. серпня/авґуста в Кіні Ілюзийон в Варшаві одбуде ся подія пн. «Ден з Юрийом Новосільскым». В проґрамі нашли ся фільмы документуючы і приближаючы особу і вызначны творы артисты. Елементом подіі буде бесіда з експертами штукы і знаємыма Юрия Новосільского, др Кристином Черні, Тадеушом Ничек і Аґатом Лавнічак. Проєкциі фільмів будут проходити од 17.00 годины. Вступне дармо.

Вмер Кжыштоф Тур

2. серпня/авґуста в Білымстоку вмер Кжыштоф Тур, заслуженый польскій тлумач літературы, автор вельох ґрафічных опрацувань, писатель і творця. Православній соспільности єст знаный головно як тлумач «Синаксария: Жывотів Святых» і вельох публикаций выдавництва «Братчык». О його осягнінях можете чытати в дописі на сайті cerkiew.pl. Хоснувателям нашого порталю лем.фм знана єст спадковина брата Кжыштофа – Єжы Тура. Материялы Єжы Тура і Барбары Тондос про забыткы, архітектуру, будівництво і культуровый краєвид полудньово східньой Полщы, в тым Лемковины, были в 2009 р. переданы Рускій Бурсі в ціли діґітализациі, опрацуваня і удоступніня до науковых, дослідничых і выставенничых ціли. Цифровый Архів Єжы Тура і Барбары Тондос найдете в закладці «архів» на нашым портали.