Сумар дня на 25. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2023 р.

«Лемківскє співаня» на Нижнім Шлеску

О два тыжні, в суботу 9. вересня/септембра в Высокым в ґміні Рудна одбуде ся друга едиция імпрезы пн. «Лемківскє співаня». Подія зачне ся о 15.00 год. святочным хороводом і символичным розпаліньом ватры. Звіздами вечера будут Крамбабуля і Вороны, а окрем того буде мож обзерати і ґрузіньскій балет. Запрезентуют ся тіж ансамблі Розтока, Perła z Пшыбыловиц, Sasanka, Дамир і Magia Folkloru. Підчас імпрезы буде мож попрібувату лемківску і ґрузіньску кухні. Будут і інчы атракциі, такы як стоіска з ремесельныма творами і креативна зона.

Дальшы подіі Рока Юрия Новосільского 

Фурт проходят акциі звязаны зо святкуваньом Рока Юрия Новосільского – в сотну річницю його народин. Вчера, 24. серпня/авґуста в Нацийональным Музею в Кракові одбыла ся стріча пн. «Новосільскій і Матейко в Кракові. Візита в Нацийональным Музею», в рамках «Літа з Ягайлоньскым Клюбом». Разом з історичком штукы мож было звиджати дві выставы: «Матейко. Маляр і істория» та «Новосільскій. В сотну річницю уродин». Выставу творів Новосільского мож індивідуально звиджати в музею іщы лем до 15. жолтня/октобра тр. Сотну річницю уродин Юрия Новосільского одзначыли і в давній лемківскій Одреховій (саноцкій повіт), де родил ся отец артисты. Припомянуты были лемківскы коріня Новосільского і культура, котра сильно влинула на його творчіст. В Одреховій од початку серпня/авґуста проходили варштаты іконописаня і театральны варштаты. А о тыжден, в пятницю 1. вересня/септембра в Сосновци одбуде ся выклад під звіздами пн. «Ріжны лиця любови в малярстві Юрия Новосільского», на котрый просит Сосновєцкій Центр Штукы Замок Селецкій.

Выстава з нагоды вписів деревяных церкви і костелів на список UNESCO.

Уж неодолга, од 5. вересня/септембра буде мож в Ґорлицях обзерати выству пн. «Феномен деревяной сакральной архітектуры. Костелы і церкви на списку світовой спадковины UNESCO», яку орґанізує Нацийональный Інститут Спадковины з нагоды ювілею вписів на список UNESCO. Выстава має упамятнити ювілей 20-літя впису Деревяных костелів Полудньовой Малопольщы і 10-літя впису Деревяных церкви в польскым і украіньскым реґіоні Карпат. В рамках выставы презентуваны сут фотоґрафіі выріжненых вписом обєктів, вказуючы іх архітектуру, внутрішню част і богате выпосажыня. Кажда знимка має свій короткій опис, в тым історичну нотатку. Серед презентуваных обєктів находит ся і святыні з Лемковины, м.ін. з Рыхвалду, Квятони ци Брунар. Дотля выстава была експонувана в Ланьцуті і Ряшові. Актуально єст доступна для звиджаюлых Музей Народного Будівництва в Саноку, до кінця того місяця. В Ґорлицях буде єй мож видіти нецілый місцяц, до кінця вересня/септембра.

Премєра спектаклю «Бомбель» 

Уж в тоту неділю, 27. серпня/авґуста, пройде премєра спектаклю пн. «Бомбель». Пєса є зрыхтувана Стоваришыньом ім. Мирка Нагача «Білый сокіл» та Меджепоколіньовом Tеатральном Ґрупом Племя, на основі оповіданя Мирка Нагача з тым самым наголовком. Театральня адаптация оповіданя єст можлива завдякы дотациі Театрального Інституту ім. Збіґнєва Рашевского. Спектакль вырежысерувала Моніка Бабуля – думкодавчыня і ініцияторка театральной адаптациі, разом з Мариюшом Лясковскым. Недільну премєру пєсы буде мож видіти о 20.00 год. на сцені в Ждыни при ватровиску. Спектакль презначеный єст лем для полнолітніх обзерачів.