Сумар дня на 13. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 13. жолтня/октобра 2023 р.

«Світ під Кычером» серед найліпшых фольклорных фестівалів на світі

Меженародный Фольклорный Фестівал «Світ під Кычером» был вызнаный Выконавчым Комітетом FIDAF (Федерация Медженародных Танцювальных Фестівалів) за єден зо штырьох найліпшых в 2022 р. фольклорных фестівалів той елітарной федерациі. Рішыня было подане на Конґресі FIDAF, котрый проходил в минулым тыжни в Кореі. Головным орґанізатором фестівалю «Світ під Кычером» єст Лемківскій Ансамбль Пісні і Танця «Кычера» з Ліґниці.

ХХІХ «Костельникова осін»

Як поінформувала аґентура Рутенпрес в днях од 10. до 17. листопада/новембра буде проходила культурна маніфестация «Костельникова осін». То уж 29. едиция подіі посвяченой літературі і красному слову. Традицийно зачне ся в основній і середній школі «Петро Кузмяк» в Рускым Керестурі од промоциі актуальных выдавництв НВУ «Рускє Слово» за молодшу чытательну публику. В тот сам ден вечером в Домі Культуры Рускій Керестур одбуде ся центральный проґрам «Костельниковой осени» з промоцийом тогорічной выдавательной діятельности НВУ «Рускє слово». Дальшы дни маніфестациі будут проходити окрем Руского Керестура і в Кули, Дюрдьові, Коцурі і Шыді. Неодолга явит ся детальнійшый проґрам подій в рамках тогорічной «Костельниковой осени».

Польковицкій шпыталь буде єдным з наймодернійшых в реґіоні

В минулый понедільок ґміна Польковиці отримала промесу на маґнетичный резонанс, котрый буде ся находил в плянуваній новій части шпыталя в Польковицкым Центрі Здравотных Услуг. Кошт такого ґратя то понад 6 млн злотых. Як повіл Mіністер Кжыштоф Кубув, шеф Політичного Ґабінету Премєра Матеуша Моравєцкого, Польковиці потрібуют добрых медичных условій, доброго ґратя – жытелі не будут мусіти іти до Любіна, Ліґниці ци Ґлоґова. Шпыталь має ся стати єдным з наймодернійшых осередків в реґіоні. Плян розвитку інституциі є поділеный є на три етапы: першый то допосажыня і выремонтуваня істнуючого будинку, другій то розбудуваня опікунчо-лікуючого закладу з ґериятричным центром, де будут томоґраф і резонанс. В посліднім етапі побудуют операцийны салі. Додатково звекшыт ся чысло паркінґовых місц перед шпытальом. Позволіня на будову мало бы быти готове іщы в грудни/децембрі тр.

«Од Андрия Вархолы до Andy Warhola i назад»

В минулу середу 11. жолтня/октобра в Музею Русиньской Культуры в Пряшові прошол вернісаж выставы пн. «Од Андрия Вархолы до Andy Warhola i назад». То першыраз як творчіст Енді Варголя гостит в русиньскым музею в Пряшові. Унікальна є і концепция выставы, кєд же Варголь вказаный не лем як іконічный артиста, але і хлопец з русиньской родины. Выстава є зрыхтувана во спілпрацы з Музейом Модерной Штукы Енді Варголя в Меджелабірцях. Кураторами выставы сут Мартін Цубяк – директор меджелабірского музею і Михал Быцько – умелецкій менадждер і куратор музею. Як заявил вчас вернісажу Матрін Цубяк, в будучности хотят разом з Варгольовым музейом в Пітсбурґу і родином Енді Варголя зреализувати проєкт, котрый принесе новы інформациі о Варголи, котрый был сыном русиньскых іміґрантів в США. Більше про вернісаж і саму выставу можете чытати в дописі на нашым портали. Експозиция буде доступна до 17. січня/януара будучого рока.

«Новосільскій в Лодзи»

В тот сам ден, в середу 11. жолтня/октобра в Музею Штукы в Лодзи одбыл ся вернісаж выставы пн. «Новосільскій в Лодзи». Експозиция вказує творы зроблены артистом протягом 12 років (1950-1062), коли прожывал в Лодзи. То мало знаный шыршій публиці період, в котрым в його малярстві дотерали ся абстракция, реализм і влияня іконописаня та возникали сценоґрафічны і лялькарскы проєкты для лодзіньского театру ляльок. Выстава буде доступна до 25. лютого/фебруара будучого рока.