Сумар дня на 16. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 16. жолтня/октобра 2023 р.

Тырват Літературный Конкурс Мариі Мальцовской

Од 2. вересня/септембра до 25. листопада/новембра тырват ювілейна 10. едиция Літературного Конкурсу Мариі Мальцовской на найліпшы творы в обшыри поезиі, прозы, есеів і драмы в літературным русиньскым языку. Конкурс є орґанізуваный Сполком Русиньскых Писателів Словациі во спілпрацы з Академійом Русиньской Культуры Словацкой Республикы і Інститутом Русиньского Языка і Культуры Пряшівского Університету. Зголошувати до участи в конкурсі мож ориґінальны літературны творы, якы мают од 10 до 20 сторін тексту, дотепер ниґде непубликуваны. Дрібниці про зголошыня сут поданы на інтернетовым сайті орґанізатора акциі. Зголосити свій текст може каждый автор од 18. рока жытя жыючый на Словациі. Конкурс єст анонімовый, зато особовы даны автора мусят ся находити в додатковій заклиєній коперті – будут они одкрыты аж по оцініню конкурсовых творів. Выголошыня результатів конкурсу пройде в половині грудня/децембра тр. Найліпшы творы будут оцінены і опубликуваны в часописі «Русин».

Стріча з авторами альбому «Тихій мемориял – Ґрибівска Саґа»

Стоваришыня Саґа Ґрибів просит на авторску стрічу з авторами печатаного в тым році артистично-історичного альбому «Тихій мемориял – Ґрибівска Саґа». На книжку складают ся візуальны і текстовы наррациі о Ґрибові і його жытелях припомянутых на муралях і дескалях Аркадиюша Андрейкова. Подія одбуде ся уж в тоту суботу, 21. жолтня/октобра о 16.00 год в Кіні «Біла» в Ґрибові. Стріча пройде з участю автора муралів, авторами текстів і фотоґрафій в альбомі, але і запрошеныма родинами осіб представленых на муралях і в альбомі. Окрем того буде і музична част, в котрій выступит дует вокалисток і інструменталисток, ансамбль Вспак. Ґрупа запрезентує традицийну лемківску музику, навязуючы до єдной з тем альбому. Вступ на подію єст дармовый, а каждый участник отримат еґземпляр альбому.

Ґміна Польковиці высоко в самоурядовых ранкінґах

В минулым тыжни в Катовицях проходил 21. Самоурядовый Форум Капіталу і Фінансів. Його головном частю была шторічна Ґаля Самоурядовых Інвесторів. Підчас подіі были вручены нагороды і выріжніня для міст і ґмін, котры найвеце выдали на інвестициі. Выголошеный был і список лавреатів званя Успіх Канденциі 2018-2023. В обох катеґориях четверте місце заняла ґміна Польковиці. Як подал бургомайстер Польковиц Лукаш Пузнєцкій, высокє місце в катеґориі інвестицийных выдатків вказує, што іх стараня, жебы інвестициі в розвиток міста были замаховым колесом для фунґуваня цілой ґміны, найдуют узнаня в незалежных ґреміях.

Стрічы Трьох Поколін уж в тот вікенд

Припоминаме, што уж в тот вікенд 21.-22. жолтня/октобра XVI Стрічы Трьох Поколін – подія орґазнізувана Кружком Стоваришыня Лемків в Пшемкові. Тогорічны Стрічы потырвают два дни – першый ден подія пройде в Пшемкові, а другій в Радваницях. На концертах запрезентуют ся ґаздове – ЛАПіТ «Ластівочка», його діточа ґрупа «Ластівчата» і запрошены гості. Хоц орґанізаторы мают уж цілый проґрам рішеный, несподіванком буде, якы ансамблі окрем ґаздів будут ся презентувати на обох сценах. Стрічы Трьох Поколінь то подія, яка каждого рока громадит великє чысло Лемків з Пшемкова і околиц та іх польскых приятелів. В суботу 21. жолтня/октобра подія одбуде ся в Пшемківскым Осередку Культуры, а о ден, в неділю 22. жолтня/октобра, в Ґмінным Осередку Культуры в Радваницях. Початок о 16.00 год.