Сумар дня на 11. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 11. грудня/децембра 2023 р.

Украінскій парлямент принял новелизациі тыкаючы прав меншын

Як поінформувала аґенция Interfax – Украіна, Парлямент Украіны принял новелизациі тыкаючы нацийональных меншын, в тым вчыня в іх языках. В минулу пятницю 8. грудня/децембра украіньскій парлямент принял зміны законів тыкаючых прав нацийональных меншын: «О локальным самоуряді», «О высшій едукациі», «О освіті», «О забезпечыню фунґуваня украіньского языка як державного», «О загальноосвітнім середнім шкільнцтві», «О нацийональных меншынах (соспільствах) Украіны» і «О медиях». Припомнийме, што схваліня Украіном закону про нацийональны меншыны то єден з вымогів Европейской Уніі в рамках наданя статусу кандидата до вступу до ЕУ. За аґенцийом Interfax, проєкт закону ґарантує право до хоснуваня в едукацийным процесі языка нацийональной меншыны при украіньскым. Тыкат тото нацийональных меншын Украіны, котрых языкы сут офіцийныма языкамы ЕУ. Припомнийме, што Русины фурт не сут вызнаны Украіном як нацийонанальна меншына і не служат ім права нацийональных меншын. Мимо вельолітньой борбы русиньскых орґанізаций о єднакы права для нашого народу, Русины фурт сут украіньскыма властями іґноруваны.

«Гайда. Бескід без кіту» номінувана до Книжкы 2023 Рока

Як поінформувала Польска Секция IBBY, книжка Мариі Стшелецкой пн. «Гайда. Бескід без кіту», печатана выдавництвом Libra PL, отримала номінацию до ґрафічной нагороды в катеґориі авторкса або/і образкова книжка в конкурсі Книжка 2023 Рока. «Гайда» то третя част з циклю книжок, котрых фоном сут лемківскы села в Низкым Бескіді, і котры навязуют до траґічной Акциі «Вісла», выгнаня Лемків з іх отчызны. Як і в попередніх публикациях, Мария Стшелецка єст авторком заєдно тексту, як і ілюстраций. За рецензийом юроркы конкурсу Йоанны Олех: «Мария Стшелецка в мастерскій спосіб зсинхронізувала своі ілюстрациі з місцьом і часом, о котрых бесіда в книжці». Акварелі вписуют ся в стиль епохы 40. і 50. років минулого столітя. До тексту авторка долучыла і природничы таблиці з малюнками рослин і звірят.

Ремонты в польковицкых блоках

Як інформує польковицкій кооператив, з новым роком в дакількох блоках на обшыри Польковиц зачнут ся ремонты на сходовых клітках. Кооператив рыхтує конкурс оферт. Ремонтовы працы будут проходити в блоках при улицях Скальніків, Мєдзяній і Штыґарскій. В рамках ремонтів будут м.ін. малюваны стіны, кладены новы плиткы, выміняны поручы. Такы ремонты, фінансуваны з ремонтового фонду кооперативу, ведены сут все в зимовых місяцях, коли атмосферичны условія не позваляют вести робіт на зовни будинків. Ремонты поєдных кліток повинны тырвати не долше як місяц. Порядок проведіня ремонтовых робіт залежыт од выконавці.

«Пасийотека молодого чловека»

В минулый вікенд завершыли ся діяня в рамках проєкту «Пасийотека молодого чловека». Акция тырвала в Польковицях од жолтня/октобра тр. Проєкт Польковицкого Центра Вольонтерства лучыл в собі пригоду, штуку і інтеґрацию полносправных діти з дітми з неполносправністю. В його рамках што вікенд проходили варштаты, котры были нагодом до забавы, артистичной творчости і інтеґрациі. Спільны занятя дали можливіст будуваня позитивных реляций медже полносправнима дітми і тыма, котры потрібуют особливой увагы і спертя.