Сумар дня на 14. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 14. грудня/децембра 2023 р.

Лемкы проти ксенофобіі

В звязку з вітірковым ганебным злочыном посланця Сойму Польской Республикы Ґжеґожа Брауна, як члены Стоваришыня «Руска Бурса» в Ґорлицях і редакция медияльной групы ЛЕМ.фм+ высловлюєме солідарніст з жыдівском спільнотом Польщы і світа в звязку з выкликаным скандальом в польскым парляменті. Ханука – Ден Огня, Праздник Світел – то радістне жыдівскє свято, тым більше іщы раз кличеме: стоп ксенофобічным і антисемітскым девіяциям в публичным просторі. Посол Браун то знаный ксенофоб, антисеміта, якій своі преступліня вкрыват за посольскым іммунітетом. Припоминаме, што вчас конференциі, яка проходила 4. грудня/децембра, оскаржыл Лемків, якы старают ся о зворот зрабуваного комуністами маєтку о тото, же чынят тото безосновно. Тым разом посланцьови не сподавали ся традициі жыдівской меншыны в Польщы.

Протест лемківской спільноти

В звязку з послідніма медияльныма донесінями, якы вдарают в історичну правду і спільнотовы добра Лемків, Стоваришыня Лемків – найстарша повыселенча лемківска орґанізациі в Польщы оприлюднила комунікат, в якым потуплят рішыня Інституту Нацийональной Памяти вс. ремісиі слідства што до рішыня з 1947 р. о проведіню акциі «Вісла». Заєдно в тым комунікаті Стоваришыня Лемків однесло ся до неправдивых інформаций допису редакциі Wirtualna Polska під наголовком «Piąty rozbiór Polski». Орґанізация заявила, што подаваны там інформациі сут шкалючы і ничым неоправданы. Своє освідчыня выдали тіж владыкы грекокатолицкой Церкви в Польщы, якы так само потупили рішыня ІНП і реченый комунікат. Што цікаве – і будуюче в примірі грекокатолицкой Церкви в Польщы – в своім комунікаті владыкы спонинают окрем Украінців і Лемків як тоты особы, што были обняты выселіньом. В інчых примірах Лемкы часто не были браны до увагы, або окрисланы як Украінці. Скорше свій протест высловило і Стоваришыня «Руска Бурса» в Ґорлицях.

Нова влада в Польщы і нове МВСіА

Вчера в Польщы дошло до офіцийной зміны уряду влады. По 8 роках владу оддал Матеуш Моравєцкій, а заступил го премєр Дональд Туск. Міністром Внутршніх Справ і Адміністрациі в новым уряді влады остал Марцін Кєрвіньскій. То як раз МВСіА одповідат за фінансуваня нацийональных і етнічных меншын в Польщы. Всякого рода рішыня, якы тыкают ся меншын, сут реализуваны тым міністерством.

Свято копальників в польковицкым і любіньскым реґіонах

Лемкы з обшыри польковицкого і любіньского реґіонів одсвяткували Ден Копальника. Центральны православны празднуваня одбыли ся 4. грудня/децемвра – в праздник Введіня во храм Пресв. Богородиці (за старым стильом) і свято св. Варвары (за новым стильом). Богослужыня проходили в любіньскій церкви, а торжеству проводил владыка Юрий, архієпископ вроцлавско-щеціньскій. Як інформує парох – о. Богдан Репела, тогорічны святкуваня были нагодом до принятя владыком Юрийом запрошыня до спільного святочного барбуркового сніданя, якє традицийно было орґанізуване Зарядом компаніі KGHM Polska Miedź S.A.

Першы велиі в ґміні Польковиці

Як інформує ґміна Польковиці, слухачкы і слухачы Польковицкого Університету Третього Віку стрітити ся в предсвяточній атмосфері в рамах зорґанізуваной велиі. За прикрашеныма столами засіло гідні студентів – сеньорів. Разом зо студентами святкували тіж власти Учельні Яна Выжыковского, при котрій діє Польковицкій Університет Третього Віку. Велийна стріча зо студентами – сеньорами то єдна з першых з цілой сериі передвелийных стріч, якы сут орґанізуваны ріжныма середовисками на обшыри ґміны Польковиці.