Сумар дня на 22. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 22. грудня/децембра 2023 р.

Новый полномічный влады СР про нацийональны меншыны. В плянях ліквідация меншынового фонду

Влада Словацкой Республикы на засіданю в середу 20. грудня/децембра выменувала нового полномічного про нацийональны меншыны. Тота функция была необсаджена од 25. жолтня/октобра, коли был одкликаный Ласло Буковскій. Новым полномічным влады Словацкой Республикы про нацийональны меншыны стал Акош Горонь. Словацка влада так само подала Плян леґіслятивных задач влады СР на 2024 р. На червец/юній эст заплянувана Пропозиция закону о Фонді на підпору культуры. Принятьом такого закону перестали бы істнувати два актуальны фонды, в тым меншыновый. Проти зліквідуваню меншынового фонду выникнула уж громадяньска петиция. Дрібниці чытайте в дописі на нашым портали.

Презентация діаконьскых двери в церкви в Бортным

Музей Дворы Карвациянів і Ґладышів в Ґорлицях просит на презентацию діаконьскых двери в церкви в Бортным, котрых творцями сут Богдан Карел і Петро Криницкій. Подія одбуде ся о тыжден, в пятницю 29. грудня/децембра о 14.00 год. В рамках стипендияльного проґаму «Мастер-Ученик» од мая до грудня/децембра тр. проходил цикль стріч, підчас котрых Богдан Карел, сницар з Лося, вчыл Петра Криницкого різбліня в дереві і выбраных сницарскых технік. Цілю проґраму было вчыня традицийного ремесла звязаного з реґіоном Лемковины, з котрого походят мастер і ученик. Результатом проєкту єст різба в подобі неістнуючых діаконьскых двери в бароковым іконостасі з XVIII столітя в бортняньскій церкви. Проєкт был зреализуваный в рамках Стипендияльного Проґраму Нацийонального Інституту Культуры і Спадковины Села «Мастер-Ученик» з середків Міністра Рільництва і Розвитку Села.

«Гайда. Бескід без кіту» стала Книжком Рока 2023

В минулый понедільок одбыла ся ґаля Польской Секциі IBBY. Нагороду в літературній катеґориі Книжка Рока 2023 PS IBBY за книжку для старшых отримала Мария Стшелецка. Доцінена была третя част бескідской трилоґіі пн. «Гайда. Бескід без кіту», печатана выдавництвом Лібра PL. Окрем того авторка отримала ґрафічне выріжніня в катеґориі образкова/авторска книжка. Припомнийме, што і попередні части бескідской трилоґіі отримали нагороды в конкурсах Книжка Рока PS IBBY 2020 і 2022.

В Польковицях зачали будову світловоду

Тырват реализация І етапу проґраму «Польковиці 4.0». Його головном цілю єст запевнити доступ до услуг операторів в обшыри телекомунікациі вшыткым жытелям ґміны, котры актуально не мают до них доступу. Ґміна підписала догваріня на доставу ґратя, котре має запевнити безпеку хоснуваня інтернетовой сіти – м.ін. хоронити перед зовнишніма атаками і вірусами. То вступный етап реализациі будовы світловоду в ґміні Польковиці. Служыт він збудуваню базовой інфраструктуры. Першый етап підлучыня хоснувателів має ся завершыти в будучым році.

Різдвяны желаня од нашого ансамблю

А на конец днешніх новин хочеме передати святочны желаня вшыткым тепер празднуючым Рождество Христове, котрого велия припадат за григорияньскым каленарьом в найблизшу неділю. Вшыткым слухачам, котры святкуют Різдво уж тепер, желаме Божой благодати, миру, щестя, здравля і вшыткого найліпшого в новым 2024 році. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.

Джерело фотоґрафіі: FB Muzeum Dwory Karwacjanów i Gładyszów w Gorlicach