Сумар дня на 23. січня/януара 2024 р.

Приносиме вам сумар медияльной ґрупы ЛЕМ.фм+ на ден 23. січня/януара 2024 р.

Ци потяг з Мушыны до Попраду буде курсувал через цілый рік?

Ґрупа «Громадяньска ініциятива Польща-Словация-автобусы» передала петицию до самоурядів Малопольского Воєвідства і Пряшівского Самосправного Краю про дотриманя догварінь принятых в 2017 р. в часі стрічы польско-словацкой медженародной ґрупы до справ комунікациі. Догваріня тыкали ся введіня цілорічного, штоденного желізничного получыня на трасі Мушына-Попрад по успішным пілотажовым періоді, котрый подля ґрупы уж давно минул. Ґрупі в минулым році вдало ся урухомити трансграничне автобусове получыня з Крениці до Бардийова, тепер хотят, жебы сезонове, вікендове получыня Мушына-Попрад, котре што рока притігят многє чысло туристів лишыло ся в желізницьовым розписі. Ініциятиву підтримує Бургомайстер Мушыны, Ян Ґольба. Як підкрислил, кажде нове трансграничне получыня то нагода до туристичного розвитку міста. Од долшого часу бесідує ся тіж про збільшыня чысла пристанків на трасі переізду потягу, м.ін. в Лелюхові, ци зміну розкладу, так жебы подорожуючы мали більше часу на звиджаня.

Уж не Округовый Музей в Новым Санчы а Музей Сандецкой Землі

Од 24. січня/януара Округовый Музей в Новым Санчы буде функцийонувал під новом назвом Музей Сандецкой Землі. Такє рішыня підняли радны Соймику Малопольского Воєвідства в часі остатньой в 2023 році стрічы. Як мож чытати в поясніню схваліня, нова назва має на ціли полнійшу ідентифікацию Музею при увзглядніню м.ін. історичной териториі Сандецкой Землі, характеру і значыня громадженых збірок в перспективі розвитку музейной колекцйі, транспарентности, але тіж ідентифікациі в загальнопольскым вымірі. Рішыня про зміну назвы інституциі радны приняли при догваріню з Міністром Культуры і Нацийональной Спадковыны. Згідні з представленым Соймиком документом окрем назвы змінит ся тіж чысло членів Рады Музею – до той поры было 11., тепер в раді буде 13. членів.

Лемківскє колядуваня в Розділю

В минулу неділю 21. січня/януара в бывшым будинку школы в Розділю прошло спільне лемківскє колядуваня получене з дітячым вертепом. Ініциятором і орґанізатором стрічы была Грекокатолицка Парохія Народжыня Пресвятой Дівы Мариі. Молодых акторів до вертепу зрыхтували отец Григорий Пацан, шолтыска села Моніка Тылявска і родиче. Облечыня і сценоґрафію зрыхтувал Ярослав Тылявскій. В стрічы участ взяло многє чысло жытелів з цілой ґміны Липинкы, в тым тіж війт Чеслав Ракочый, котрый уфундувал малый почастунок до колядуваня. На конец подіі голос забрали о. Пацан, котрый подякувал своім парохіянам за зрыхтуваня і культивуваня лемківскых реліґійных традиций, та Моніка Тылявска, яка вказала на особливу можливіст інтеґрациі локальной спільноты при стрічах такых як тота.

«Звязкова ґміна о сеґреґациі не забыват»

Звязок ґмін Мідьового Басену (ЗҐМБ) просит діти і молодіж в віку од 6 до 12 років до участи в плястичным конкурсі «Звязкова ґміна о сеґреґациі не забыват». В рамках конкурсу треба зрыхтувати ілюстрацию, котра буде вказувала характеристичне місце, будинок ци обєкт находячый ся в ґміні, в котрій прожыват участник разом з елементом звязаным з сеґреґацийом одпадів. Цілю конкурсу єст пошырюваня знаня на тему принципів правильной сеґреґациі. В Польковицях  творы можна складати до 14. лютого/фебруара в будинку ЗҐМБ. Конкурсова капітула нагородит по єдным лавреаті і выріжніню з каждой ґміны, зас каждый участник достане едукацийну книжочку, выдану на основі пересланых прац. Дрібниці конкурсу находят ся на сайті Звязгу ґмін.