Місто бунту

Су-чоу є кітайске місто на току рікы Ян-це-тьян, котре має подля послідніх доступных даных, якы суть із 2017-го року, 5 380 000 жытелів. Словацька републіка мала ку марцу 2023-го року 5 426 857 жытелів. Значіть великость Словакії за чіслом жытелів є на уровни 16-го найвекшого кітайского міста.

Словацькый премєр Роберт Фіцо, котрый веде країну під Татрами од октобра минувшого року, радо бісідує о тім, же він і його влада хотять робити загранічну політіку на вшыткы штири світовы стороны, же хоче робити горду, народну політіку, в котрій на першім місці суть інтересы Словакії, хоснує в тій темі фразы так добрі знамы од вшыткых популістів світа, котры бы собі могли подля взору з добы перед 1989-ым роком взяти за своє мотто: Популісты вшыткых країн соєдиняйте ся.

Кедь ся посмотриме на то, што бісідує, і на то, што пак є реалностьов, загранічна політіка має далеко од того, што Фіцо декларує. Прикладів є веце.

Наприклад, кедь пришов до Мадярьска, Віктора Орбана не жадав, жебы уж ниґда не бісідовали в Будапешті в рамках офіціалных форумів о Фелвідеку, жебы мадярьска влада не скуповала будобы і фундушы на Словакії, але як такый малый школярик при великім учітельови выхвальовав словацько-мадярьскы односины, бісідовав о тім, як много того мають тоты дві країны, розумій Фіцо і Орбан, сполочного, а вшытко было в найліпшім порядку.

Іщі веце траґімкомічным суть його остры слова проти Брусела, котрыма кормить свою базу людей, котры на нього і його партію голосують, но реално дотеперь заголосовав за вшытко, за што голосовати треба было в Бруселі, і в тых припадах, коли Мадярско не голосовало.

Кедь Словакія підписала оборонный договор із Споєныма штатами Америкы, партія Роберта Фіца роздістрібуовала по цілій країні білборды з фотками депутатів, котры за тот договор голосовали, і были на них означены як велезрадници. До минуты втогды Фіцо хотів зрушыти договор, покля буде при властях. Днесь його горда загранічна політіка хоче лем отворити тот договор, котрый має Братіслава із своїм союзником з НАТО, і зробити зміны. Но договор не зрушыли, вояци НАТО на теріторії Словакії суть, нелем америцькы, а Роберт Фіцо знать, же і тым ся звекшує безпечность країны.

Обидві країны мають скушеность, коли в такых штруктурах не были, і напоходовали їм там чуджі войска а потисли їх.

Україні так само не буде словацька влада помагати воєньскы, але ліценції про пріватны зброярьскы фірмы Фіцова влада підписала, а зброя ся далше може на Україну експортовати. А в Києві то добрі знають, зато і по досправды шкандалозных словах Роберта Фіца не была зрушена стріча премєрів, котра одбыла ся в Ужгороді.

Было бы мож продовжовати в рахованю прикладів, котры доказують, же політіка Фіца є двотварьна, а абсолутно нич не має з тым, што о своїй загранічній політіці сам декларує. Єдине, што платить, то є досправды то, же хоче робити політіку на вшыткы штири світовы стороны, но якраз тото в реалности значіть лем єдно, же Словакію посувать ближе ку Уралу і Великому кітайскому муру.

Самособов, кажда політічна ґарнітура має право робити свою загранічну політіку, а я акцептую резултаты выборів. Но робити тото, што днесь робить Роберт Фіцо, є проти інтересам країны, а є лем вопросом часу, доколи Францію, Німецько буде бавити платити колос тіпу Европска унія, кедь на другім кінцю того колосу бы сьме грошы радо взяли, а єдночасно собі і радо до них копали.

Безпечность Словакії, в каждім смыслі, од господарьской аж по воєньску, є ґарантована якраз тым, же Словакія є членом Европской унії і Североатлантічной аліанції. А Словакія собі може підскаковати лем вдяка Унії і НАТО. А то платить і про Мадярьско. Обидві країны мають скушеность, коли в такых штруктурах не были, і напоходовали їм там чуджі войска а потисли їх.

Покля бы Словакія в западных штруктурах не была, пак бы была лем такым єдным векшым кітайскым містом, в котрім хтось робить бунт. Кедь Фіцо бісідує о політіці на вшыткы штири світовы стороны, мож собі легко представити, што такый кітайскый режім, котрый про Фіца так само не є проблемов, зробив бы з єдным містом бунту.

На Словакії нас чекать барз інтересный час. Хочу вірити, же ся не подарить в тім функчнім періоді здемоловати абсолутно вшытко, што з той країны робить країну демократічну і западну.

Статя была написана як коментарь „Вступне до контроли“ лемківского радія lem.fm.