«Слово» – 34-та неділя по Сошествії Святого Духа – неділя, 9.00 год.

За Ісусом приходить чоловік начальник з вопросом. Тот вопрос быв барз важный: Што мам робити, жебы-м набыв вічный жывот? Тот чоловік ся не звідовав дашто непотрібне, або земне, але найважнішый вопрос каждого хрістіана.

Ісус Йому не давать прямо одповідь, але ся го звідує на заповіди: Познаш заповіді? А тот одповів: Котры? А Ісус: Не убий, не чуджолож, не крадь, не будь фалшывым свідком, оддай честь отцу і матери. А тот чоловік якбы з радостьов одповів. Тото вшытко я дотримав од маленька. Так собі думав, же уж нич тяжке то не може быти. Но Ісус йому повів: Іщі єдно тобі хыбить. Ідь, продай вшытко, што маш, роздай бідным а будеш мати богатсво в небі, потім прийдь а наслідуй мене.

А він одышов засмученый од Ісуса. Ісус повів своїм ученикам, як тяжко войти богатому до Божого царьства. Ісус тоту подію, або поучіня із ньой хоче адресовати і нам. Тот чоловік давать добрый вопрос. Но не усвідомив собі перед кым стоїть.

Ту є першый хосен з днешнього слова: Познаня! Хто є Ісус. Ку кому я іду давати вопрос? Є то Владыка неба і землі, Царь царів.. Він, котрый знать вшытко. Котрый не оставать на поверьху, але іде на глубину. Він видить і вшытко скрыте. Перед ним нич не можеме сховати. Ани найтайнішы думкы ці наміріня або планы. Все, коли іду ку Ісусови, на тото памятати: Хто є Ісус Хрістос – Бог!

А другым такым моментом із днешнього слова – приходити зо щіростьов ку Ньому а приготовленостьов прияти і зробити вшытко, што нам повість. Тогды не одыйдеме засмучены, як тот чоловік, котрый, коли Ісус йому указав, дав йому одповідь – твойов проблемов, або переградов ку Божому царьству є богатство, або привязаня ку ньому.

Бо він не познав, хто є Ісус. Бере го за звычайного чоловіка а не хоче прияти Ісусове слова, або лік, котрий йому подавать: Ідь продай, роздай а будеш мати богаство.

Прото майме на памяти хто є Ісус, ку кому ідеме, кому кладеме вопрос. Приходьме зо щіростьов а приймиме його одповідь на наше спасіня.

В неділю, 28. януара 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. януара 2024 р. о 12.00 год. і 29. януара 2024 р. о 2.00 год. за русиньскым часом.