«Слово» – Закхейова неділя – неділя, 9.00 год.

Ісус Хрістос на дорозі до Єрусалима переходив через Місто Єріхон. Там быв чоловік, котрый звав ся Закхей, быв то мытарь. Мытарі выберали поплаткы про Рим, а зато были в ненавісти і тримали їх за великых грішників.

Но Закхей быв і головный мытарь, а ку тому великый богач, котрый ся обогатив на кривдах другых. Коли ся дочув о Ісусови, хотів його увидіти. Но роздумовав, як то мать зробити, бо быв малого росту. В сердці Закхея была маленька іскерка – хотіти видіти Ісуса. Його мотівація не была, жебы Його хотів наслідовати, прияв Його слова, або змінив свій жывот. Але Бог ани тоту маленьку іскерку не загасив, а запалив і в тім, котрого ненавиділи і тримали за великого грішника, огень любви і спасіня.

Закхей вышов на фіґовый стром і сховав ся меджі листьом, і так непозоровано хотів увидіти Ісуса. Но Ісус Його увидів своїм поглаядом як Бога іщі скоріше. Іщі втогды, кедь до його сердця пришла тота думка прягнутя увидіти Ісуса. Але увидів його і скорше як Закхей Його збачів. І закликав на нього: Закхею, подь долов, бо днесь мам быти в твоїм домі.

Тото Закхей не чекав. Він лем хотів увидіти Ісуса. А Він, такый вызначный чудотворец і учітель, а хоче прийти до його дому? І скоро зышов долов і прияв го з радостьов. А втогды тоты, што ішли за Ісусом, много з них зачало нарікати у своїх сердцях, же Ісус ся выбрав до дому грішного чоловіка. Повідали собі: як бы то быв Месія, знав бы, хто є Закхей. Но Ісус быв тихо.

В часі, коли сатан сіяв своє зерно похыбности і невіры в сердцях многых, в сердці Закхея Бог насаджовав новый Еден. Та земля його сердця, передтым пуста і высохнута гріхами і страстями, теперь прекрасно наповнена плодовитыма стромами і квітками. Но тото нихто з тых людей не видів. Але Ісус тото видів, а быв тихо і чекав на пригодный час.

Тот надышов, коли пришли до дому Закхея. Закхей повів: Господи, половину свого маєтку роздам бідным, а кедь я дакого скривдив, зробив йому шкоду – верну штирираз веце. А на тото Ісус повів: Днесь пришло спасіня до того дому. А втогды уста і сердця тых нарікачів і дудрошів стихли.

Стрітнутя з Ісусом змінило жывот Закхея, великого грішника. Ісус го закликав а Закхей добровольно одповів. Ісус кличе і нас. Хоче быти в домі нашой душы. На нас є, ці приймеме тото позваня, жебы сьме могли тыж учути слова: Днесь пришло спасіня до той душы. Слава Ісусу Хрісту!

В неділю, 18. фебруара 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. фебруара 2024 р. о 12.00 год. і 19. фебруара 2024 р. о 2.00 год. за русиньскым часом.