Сумар дня на 7. червця/юнія 2024 р.

Приносиме вам сумар медияльной ґрупы ЛЕМ.фм+ на ден 7. червця/юнія 2024 р.

Цілонародны ославы Дня Русинів на Словациі

В неділю 9. червця/юнія в Гуменным одбудут ся цілонародны ославы Дня Русинів на Словациі, котры рыхтує Русиньска оброда на Словациі з партнерами. Подія пройде під покровительством пріматора міста Гуменне Мілоша Мерчіка. Святкуваня зачнут ся од одслужыня двох літургій: в грекокатолицкым і православным храмах. Пак в скансені народной архітектуры одбуде ся презентация реґіонів, а дальше піде містом процесия в народных кроях. На конец в естрадній сали Містецкого Центра Культуры буде проходил ґальовый проґрам ослав. Подія єст реализувана з фінансовом підпором Фонду на підпору культуры нацийональных меншын.

Посвячыня пропамятного креста на памят бывшых жытелів Ясюнкы

Припоминаме, што в найблизшу неділю 9. червця/юнія в Ясюнці одбуде ся посвячыня промапятного креста на памят бывшых жытелів села, якы до 1947 р. заселяли тоту місцевіст. Подія зачне ся о 11.00 год. Божеском Літургійом в церкви в Ждыни. Богослужыня очелит владыка Паісий, архиєпископ православной перемышльско-ґорлицкой єпархіі. Пак присутны підут до Ясюнкы, де одбуде ся посвячыня памятника. Ясюнчане перед выселіньом частично приналежали до православной церкви – доходили до часовні в недалекій Баници. Селян выгнано в рамках Акциі «Вісла» 10. червця/юнія 1947 р. Подля офіцийных даных выселено 182 особы. Ясюнчане трафили м.ін. в околиці днешніх Студзьонок і Рудной на Нижнім Шлеску.

Крениця рыхтує ся до перенятя желізничного дворця

Крениця іщы в тым році плянує переняти од Польскых Державных Желізниц (PKP) занедбаный желізничный дворец. В буджеті ґміны на тоту ціль передвиджено близко 2 млн злотых. Говорця PKP Михал Стільґер потвердил, же хотят продати дворец, єднак неє інформациі што до даты фінализациі задачы. Як подал говорця PKP, модернізация будинку дворця в Креници не была унята в Проґрамі Дворцьовых Інвестиций з огляду на факт, же од дакількох років тырвают усталіня медже PKP a ґміном тыкаючы перенятя дворця містом. Актуально по зрыхтуваню PKP новой выціны нерухомости тырвают працы над порозумліньом медже PKP і самоурядом реґулюючым условія проведіня трансакциі. Пак, по отриманю позволінь корпорацийных і властивого міністра дворец стане ся самоурядовым обєктом. Бургомайстер Крениці надіє ся, што дворец переймут уж в тым році. Перенятя дворця было бы першым етапом до початку його модернізациі. По модернізациі будинок креницкого дворця, окрем основной функциі обсугы пасажерів, мал бы тіж давати можливіст аренды локалів під услугову діяльніст.

Потягом з Мушыны до Попраду

Мож уж корыстати з черезграничного желизницьового получыня медже Мушыном по польскій страні і Попрадом по словацкій. З початком червця/юнія зас рушыл сезоновый потяг Beliansky Expres, котрый курсує на тій трасі в літнім і зимовым часі. Мож з него корыстати в суботы і неділі аж до 1. вересня/септембра. Потяг рушат з Мушыны о год. 10.01 і в Попраді єст о 15.29. Дає то нецілы 4 годины на звиджаня, кєд ся хоче вернути до Польщы в тот сам ден. Потяг зо Словациі приізджат до Мушыны о 9.10, а до Попраду вертат аж о 18.01, што дає туристам зо Словациі цілый ден на звиджаня Мушыны і околиц.