Словацкы політикы з делеґацийом в Санковій

Перед двома днями, 7. серпня/авґуста 2024 р., в Маґурскій Господі в Маластові прошла медженародна стріча, в котрій участ взяла делеґация парунадцетьох політиків зо Словациі з польскыма властями.

В конференциі, котру орґанізували Ґміна Санкова з Нижньом Полянком, участи взяли – зо словацкой страны: міністер Ріхард Раші з Міністерства Інвестициі, Реґіонального Розвитку і Інформатизациі Словацкой Республикы, Михал Калиняк, секретар стану, Адрияна Червеньова, ґенеральна директор секциі вводжыня Проґраму Словация, Мартін Гудзік, ґенеральный директор европейской територияльной спілпрацы, Юрай Гоштак, ґенеральный директор секциі інновациі і стратеґічного розвитку та Борис Слобода, ґенеральный директор секциі проґрамуваня і підпертя Проґраму Словация.

Польску страну репрезентували Ян Шышко, секретар стану в Міністерстві Фундушів і Реґіональной Політикы, Малґожата Малух, війт Ґміны Санкова, Михал Дідух, секретар Уряду Ґміны Санкова, Катажына Рак-Ваховска, скарбник Ґміны Санкова, Михал Ставарскій, директор Европейского Уґрупуваня Територияльной Спілпрацы TATRY z o.o., Ґжеґож Бєдронь, презес Малопольской Туристичной Орґанізациі, Барбара Інґльот, директор бюра Стоваришыня Карпатскій Еврореґіон та Анджей Чарнецкій, директор бюра Звязку Ґмін Доріча Вислокы.

Конференция тыкала звекшыня ефективности реализациі спільных трансграничных проєктів через польскы і словацкы самоуряды. Вчас стрічы омовлено м.ін. адміністрацийне фунґуваня і фінансуваня самоурядів в Польщы, спілпрацу ґмін поза уставово окрисленыма компетенциями та значыня проґраму Інтерреґ Польща-Словация.

«Стріча закінчыла ся успішном дискуцийом, котра прислужыт ся дальшій трансграничній спілпрацы» – чытаме в комунікаті Ґміны Санкова.

Делеґация пак обізріла атракциі ґміны, м.ім. Історично-Сенсоричный Парк в Сярах, Палац Длуґошів в Сярах, Костел свв. Пилипа і Якова в Санковій та воєнный цмонтір но 60 – Маґура.

Фот. sekowa.info