«Слово» – Праздник Успенія Пресвятой Богородіці – неділя, 9.00 год.

Пережываме попразденство праздника Успенія Пресвятой Богородіці. Праздника, котрый нам говорить о переході Божой Матери до небесной славы. Коли ся наближыв час, Господь посылать свого архангела, жебы звістовав Марії: Уж близко є час, коли увидиш свого Сына, а будеш з Ним навікы в Його славі.

Хто може описати тоту радость? В Євангелію на праздникы Богородіці чітаме слова: Марія выбрала добру частку, котра їй не буде взята. Свята Церьков односить тоты слова ку Марії, ай коли Ісус то говорить Марії, сестрі Лазаря. Бо справды Марія выбрала добру частку. Увірила Господньому слову.

А тот проґрам ціложывтный у ньой быв: Най буде мі подля твойого слова. І тогды, коли так одповіла при Благовіщенії, і тогды, коли Ісуса прославляли і зневажали, і тогды, коли стояла під крестом, і тогды, коли Його увиділа воскресшого і вознесеного до неба.

А як надышов тот час, Господь чудесным способом згромаждив апостолів, котры ся поросходили проповідати Євангеліє, жебы были участны переходу Божой Матери і поховати тіло. І тогды сам Господь у великій славі зышов ку їй постели, жебы перевзяв душу Марії і в торжественнім проводі співу анеглів переніс до небесной славы.

А на третій день воскресив і взяв і тіло Марії до вічной славы. Так она є перша, на котрій ся одбыло тото обожествліня, та слава, котру Ісус частково указав на Ґолґоті. А як посила про нас, же коли приймеме і мы, проґрам Марії: Се раба Господня, най буде мі подля твойого слова. Як не одкличеме тот проґрам, тоты слова в часах трапліня і бід, тогды і мы вєдно з Марійов будеме мочі повісти тоты радостны слова по нашім переході до вічности: стояло то зато.

Най Пресвята Богородіця нам помагать, жебы сьме памятали на тоты слова каждого дня, жебы і час нашой смерти быв про нас блаженым і радостным. Слава Ісусу Хрісту!

В неділю, 1. септембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. септембра 2024 р. о 12.00 год. і 2. септембра 2024 р. о 2.00 год. за русиньскым часом.