Сумар дня на 25. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 25. листопада/новембра 2024 р.

Новы дороговы проєкты в Сандецкым Субреґіоні

Малопольскій воєвода передал близко 6 млн злотых на ремонты доріг в новосандецкым, лимановскым і ґорлицкым повітах. В минулу пятницю 22. листопада/новембра малопольскій ІІ віцевоєвода Ришард Сьмялка стрітил ся з самоурядовцями Сандецкого Субреґіону. Нагодом было переданя догварінь для міста Ноцый Санч та самоурядів новосандецкого, лимановского і ґорлицкого повітів, потверджаючых признаня середків з дополнюючого набору в рамках Урядового Фонду Розвитку Доріг на 2024 р. Як подал на стірчы віцевоєвода, завдякы тым середкам на малопольсых повітовых і ґмінных дорогах буде зреализуваных разом 155 дальшых інвестиций з дофінансуваньом на рівни понад 25 млн злотых. Лем самоуряды з повітів новосандецкого, ґорлицкого і лимановского одкрыют іщы в тым році 34 новы дороговы проєкты. Завдякы дофінансуваню, котре вынесе разом понад 5,7 млн злотых, в тым реґіоні буде выремонтуваных веце як 17 км одтинків локальных получынь.

Округлый жывотный ювілей владыкы Йоны

В четвер 21. листопада/новембра тр., на праздник Входу Пресвятой Богородиці до Храму, Высокопреосвященый Йона Максим, пряшівскій архієпископ i митрополита, одсвяткувал жывотный ювілей – 50 років. Як подал Інформацийный центр Пряшівской Архієпархіі, в тот ден при участи множества вірных, представників державной справы, духовенства і церковных єрархів была в Катедральным Соборі святого Йоана Крестителя в Пряшові одслужена дяковна архієрейска літургія. В торжестві брали участ высокы церковны єрархы обидвох католицкых обрядів на Словациі. Веце о жывотным ювілею владыкы Йоны прочытате в дописі на нашым портали.

Опрацуют новы концепциі трасы західньой обводниці Ґорлиц

Вертат тема будовы західньой обводниці Ґорлиц. Дорога має предовшытыкым одтяжыти закоркуваный центр міста. В буджеті соймику малопольского воєвідства на 2025 р. забезпечены были середкы, котры позволят Зарядови Воєвідскых Доріг провести процедуру ведучу до опрацуваня новых концепций трасы західньой обводниці Ґорлиц. Середкы на проєктовы працы дадут і Ґорлиці та ґміна Санкова, і сельска ґміна Ґорлиці. Конкурс оферт на выконавцю концепциі трасы той дорогы мал бы быти оголошеный на початку будучого рока.

Наукова конференция «Талергоф. Першый лаґєр інтернуваня в Европі»

Припоминаме, што уж о нецілы два тыжні в рамках лемківскых упамятнінь 110. річниці інтернуваня Русинів одбуде ся наукова конференция пн. «Талергоф. Першый лаґєр інтернуваня в Европі», на котру просят Стоваришыня «Руска Бурса» в Ґорлицях та Музей Дворы Карвациянів і Ґладышів в Ґорлицях. Конференция одбуде ся в Каштели в Шымбарку в пятницю 6. грудня/децембра. Початок о год. 10.30. Конференция має на ціли не лем упамятнити жертвы Талергофу, але тіж выкликати шыршу рефлексию над історичныма механізмами, котры довели до переслідуваня. Серед прелеґентів находят ся выдатны бадачы і реґіоналисты, котры представлят ріжны аспекты драматичных подій звязаных з Талергофом і іх влияня на лемківску соспільніст і шыршый історичный контекст Серединно-Східньой Европы. Детальный проґрам конференциі найдете на нашым портали. Вступне на подію є дармо. Конференция буде тіж нажыво трансмітувана на каналі YouTube lem.fmTV.