Гуцульскє колядуваня. Святочный мікс в Бурсі

Послідня того рока подія в Рускій Бурсі в Ґорлицях заповідат ся вынятково. Велийна стріча буде получыньом традициі з жывом культуром. Подія, котра пройде в приязній, одкрытій і святочній атмосфері, обнимат ріжны пункты проґраму. Вказане буде богатство лемківскых і гуцульскых різдвяных традиций. Стріча одбуде ся в суботу 21. грудня/децембра 2024 р., початок о 15.00 год.

Головным пунктом буде доповід др Юстины Чонсткы-Клапиты, знаной етномузиколожкы і антроположкы культуры з Ягайлоньского Університету, авторкы выдатной моноґрафіі «Колядуваня на Гуцульщыні». Єй баданя тыкают унікальных колядничых звыків того реґіону, котры, мимо сучасных змін, заховуют вельо первістных елементів духовости і традицийной обрядовости. Прелекция приближыт музичны та соспільны аспекты колядуваня, вкаже, як вельовіковы звыкы фурт влияют на достоменніст локальных соспільности. «Николи дотепер основна част традицийной культуры, яком сут коляды і колядуваня, не была так всестранно удокументувана і збадана» – написал в науковій рецензиі книжкы «Колядуваня на Гуцульщыні» др габ. Пьотр Даліґа, проф. Варшавского Університету.

Др Юстина Чонстка-Клапита вєдно з мужом, дослідником Пьотром Клапитом, активні занимают ся тіж пропаґуваньом волошской культуры. Серед іх досліджынь особливе місце занимат Шляхтівска Русь. В остатнім часі спілреализували проєкт «Біла Вода – забыте село на Пути Волошской Культуры». Ефектом проєкту была м.ін. реализация фільму о селі ци одкрытя в жолтни/октобрі тр. двох таблиц посвяченых істориі і культурі села Біла Вода. Перше зреализували проєкт «Музика без границ», котрого цілю было удокументувати музичну культуру Русинів зо Спиша, польско-словацкого погранича.

Вечер прикрасит выступ дітячого ансамблю Терочка, котрый запрезентує традицийны лемківскы коляды. Буде то выняткова нагода, жебы почути музику, яка од поколінь товаришыла Різдвяным Святам на Лемковині.

По артистичній части участникы подіі будут мочы покоштувати лемківскы велийны стравы – м.ін. кєселицю, грибы, бобалькы, горох, фізолу, юху. Не бракне тіж перогів. Вечер закінчыт спільне колядуваня.

Стріча в Рускій Бурсі буде не лем нагодом до звекшыня знаня о богатстві гуцульской і лемківской культуры, але тіж до пережытя милых хвиль в передсвяточным часі в атмосфері спільноты і радости.

Вступне на подію дармо, доповід буде выголошена в польскым языку.