Сумар дня на 30. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 30. грудня/децембра 2024 р.

Велька част фінансів новосандецкого повіту піде на інвестициі

В минулым тыжни радны рішыли приняти буджет новосандецкого повіту. Близко 30% з заплянуваных фінансів буде перезначеных на інвестициі. Як подал новосандецкій староста, Тадеуш Зарембра, буджет тот єст в якісым сенсі історичный. Барз важном річом в тым буджеті сут інвестициі, котры уж тепер на старті сут на рівни 92 млн 315 тис. злотых. Першый раз в плянуваным буджеті была перекрочена квота 300 млн злотых. Серед плянуваных інвестиций сут, примірно, завершыня проєкту геліпаду при шпытали в Креници ци дороговы інвестициі, серед них находят ся: модернізация повітовых доріг через розбудову повітовой дорогы в Навойовій та перебудову повітовой дорогы во Фльоринці і Білцаревій.

«Новосільскій. Іконы і архітектонічны ескізы»

В будучым тыжни в Кракові одбуде ся подія з назвом «Новосільскій. Іконы і архітектонічны ескізы». Стріча пройде в четвер 9. січня/януара o 18.00 годині в конференциій сали Ягайлоньской Бібліотекы. Акция одбуде ся з нагоды выданя 6. тому Каталоґу Сакральной Штукы Юрия Новосільского, выріжненого Нагородом Стоваришыня Істориків Штукы ім. проф. др. Єжы Лодзіньского за 2024 р. Подія «Новосільскій. Іконы і архітектонічны ескізы» пройде при участи авторкы публикациі др Кристины Черні та запрошеных гости: проф. др. габ. Марка Вальчака з Інституту Істориі Штукы Ягайлоньского Університету, др. Анджея Сівка з Нацийонального Інституту Спадковины, Інституту Істориі Штукы Ягайлоньского Університету та Віталия Міхальчука з Выділу «Артес Лібералес» Варшавского Університету, Музею Ікон в Варшаві. Стірчы буде товаришыл концерт церковной музикы.

Концерт коляд в православній катедрі в Ґорлицях

В минулу суботу 28. грудня/децембра в православній церкви в Ґорлицях одбыл ся концерт коляд. Выступили катедральный хор парохіі св. Тройці в Ґорлицях і Мужскій Камеральный Хор Клірос, в котрым співат духовенство ґорлицкого і креницкого деканатів перемышльско-ґорлицкой єпархіі. Запрезентуваны были традицийны лемківскы і східньославяньскы коляды. Награня концерту фурт мож обзерати на фейсбуковым сайті Православной Парохіі св. Тройці в Ґорлицях.

Вшыткого найліпшого в Новым Році!

Заран, 31. грудня/децембра, будеме пращати старый і витати новый рік. З той нагоды хочеме желати вшыткым слухачам, любителям радия вшыткого найліпшого в Новым 2025 Році. Най бы Новый Рік был про нас о вельо ліпшый як старый. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.